"Насаф" жамоаси 2014 йил 3 январидан бошлаб янги мавсумга тайёргарликни бошлайди. Жамоа ушбу кун Қарши шаҳридаги ўзига тегишли клуб базасида йиғилади ва машғулотларга киришилади, қисқа фурсатдан сўнг эса йиғин Тошкент шаҳрига кўчирилади.

Аввал маълум бўлганидек, жамоа 10 январь куни Тошкентдан Туркияга сафар уюштиради. У ерда 15 кун мобайнида ўқув-йиғин машғулотлари ўтказилади, шунингдек Туркиядаги йиғин мобайнида бир нечта хорижий клублар билан назорат учрашувлари ўтказилиши режага киритилган. Жумладан, спарринг рақиблардан бири "Насаф" жамоасининг собиқ бош мураббийи В.Кумиков бошқараётган Қозоғистоннинг "Шахтёр" жамоаси бўлади.

Бизга маълум бўлишича, Туркия сафаридан олдин аниқроғи 8 январь куни жамоа Тошкентда "Локомотив" жамоаси билан назорат учрашуви ўтказиш ҳақида ўзаро келишувга эришган. Фақатгина ҳозирча ушбу назорат учрашуви қайси майдонда ўтказилиши аниқ эмас. "Насаф" жамоаси назоарт учрашувини сунъий майдонда эмас, балки табиий майдонда ўтказилиши тўғрисида таклиф билан чиққан. Кўп эҳтимолга кўра бу майдон Тошкент вилоятидаги "Дўстлик" стадиони бўлиши ҳам мумкин.

Яна бизга маълум бўлдики, "Насаф" клуби шартномалари муддати тугаган баъзи ўйинчилар билан хайрлашиши мумкин. Ҳозирча бу номзодлар ҳақида аниқ маълумотга эга эмасмиз. Бу ҳақда 3 январдан сўнг аниқ бўлиши кутилмоқда. Аммо Жаҳонгир Жиямуродовни "Насаф"дан кетиши тобора ойдинлашиб бормоқда. Тахминимизча, у Тошкентнинг "Бунёдкор" жамоасига ўтиши мумкин.