Кеча "Бухоро" жамоаси иккинчи босқич йиғинини бошлади. Жамоа ихтиёрига маҳаллий футболчилардан ташқари вилоятдаги футболчилар ҳам келиб қўшилишди. Шу куни жамоа бош мураббийи Эдгар Гесс хам Бухорога етиб келди. Жамоа билан таништирув маросимидан сўнг Гесс дастлабки машғулотни ўтказди.

Клуб 3-17 январь кунлари Бухорода машғулотларни давом эттиради. Машғулотлар жараёнида янги футболчилар синовдан ўтишади.

"Бухоро" ПФЛ томонидан легионерлар борасида олий лига клубларига қўйилган "3+1" лимитидан тўлиқ фойдаланишмоқчи.  Жамоани тарк этган легионерлар ўрнини мураббийлар маҳаллий футболчилардан бир бош устун, легионер номига лойиқ футболчиларни қидиришди. Футболчи танлаш жараёнида унинг статистикаси, хулқ-атвори ва энг асосийси, унинг кўплаб учрашувлари тушурилган дисклар таҳлил қилиниб, жамоага таклиф этилади.

Яқин кунлар ичида "Бухоро" жамоаси ихтиёрига икки нафар сербиялик футболчи келиб қўшилади. Уларнинг номлари ҳали ошкор этилгани йўқ. Шуниси маълумки, уларнинг бири ҳимоячи бўлса, иккинчиси ярим ҳимоя амплуасида ҳаракат қилади. Улар мураббийлар штабига маъқул келсалар, жамоа легионерлар билан шартнома имзолайди.

21 январ куни "Бухоро" делегацияси Тошкент шаҳрида тўпланади ва 12 февралга қадар пойтахда шуғулланади. Тошкент йиғинида жамоа 5-6 та ўртоклик учрашувларни ташкил этиши режага киритилган.