«Пахтакор» ҳужумчиси Темурхўжа Абдухолиқов «Тошкент» телеканалининг «Спортчининг бир куни» кўрсатувида меҳмон бўлди. Кўрсатув давомида футболчининг бир кун давомида қиладиган ишлари ҳақида лавҳалар намойиш этилди.
Кўпчилик футболчиларга хос бўлмаган ҳолда Темурхўжа жуда равон нутқга эга экани билан эътиборни жалб қилди. Кўрсатув охирида бунинг сабаби ҳам маълум бўлди. Ҳужумчи машғулотлардан бўш вақтида кутубхонада ҳам бўлиб турар экан. Унинг таъкидлашича, айни вақтда Салоҳиддин Тошкандийнинг «Темурнома»си мутолааси билан банд экан. Европа футболида Эрик Контана, Лиллиан Тюрам, Сергей Игнашевич каби футболчиларнинг адабиёт шайдоси эканларини билардик. Бизда ҳам шундай футболчиларнинг борлиги кишини қувонтиради. Темурхўжанинг айтишича, китоб ўқиш майдонда тез фикрлашга ҳам ёрдам берар экан.
Бошловчининг терма жамоада ҳужумчиларнинг етишмаётгани ҳақидаги саволига эса футболчи қуйидагича жавоб берди:
«Клубларимизнинг кўпчилиги битта ҳужумчи билан ўйнашади ва ёш ҳужумчиларга имкон беришмайди. Айнан шунинг учун биздан кучли ҳужумчилар кўп ҳам етишиб чиқавермайди»,- дейди футболчи.
