Хитой ёшлар (U22) терма жамоаси бош мураббийи Фу Бо Ўзбекистоннинг ўйинини ёшлар ўртасидаги Жаҳон чемпионати баҳслари орқали ўрганганини айтиб ўтди.

"Ўзбекистоннинг ёшлар ўртасидаги ЖЧдаги ўйинлари ёзилган видеоёзувларини кўриб чиқдик. Улар жуда яхши ўйин намойиш қилишган. Улар нафақат индивидуал жиҳатдан кучли, балки бир жамоа сифатида ўзаро уйғунликда ҳам яхши ўйин кўрсатишган. Футболчилар олдиндан нима қилишни яхши билишади. Бундан ташқари, улар ҳимояда ҳам яхши ўйин кўрсата олишади. Ўзбекистон кучли рақиб, акс ҳолда бу жамоа ЖЧнинг чорак финалига чиқа олмаган бўларди. Биз ҳар бир ўйинда керакли тактикани танлаб, жипслашган ҳолда ўйнашимиз ва рақибга қаттиқ қаршилик кўрсатишимиз лозим", дейди Фу Бо.

Хитой U22 терма жамоаси 2013 йилнинг октябрь ойида Шарқий Осиё ўйинларида иштирок этди. Уларнинг натижалари салбий бўлди. Улар Жанубия Кореяга 1:2, Японияга эса 0:2 ҳисобида имкониятни бой бериб, фақат Гонконг билан дуранг ўйнашди (0:0). Хитойликлар Уммондаги мусобақа олдидан Уммонга қарши ўртоқлик ўйинида 0:1 ҳисобида ютқазишган бўлса, Иорданияни мағлуб этишди (2:1).

Хитой терма жамоаси бош мураббийи Фу Бо жамоа олдига гуруҳдан чиқиш вазифасини қўймоқда.

"Бизнинг гуруҳни "ўлим гуруҳи" дейиш мумкин. Ироқ ва Ўзбекистон ёшлар терма жамоалари ЖЧда яхши иштирок этишган бўлса, Саудия Арабистони терма жамоаси саралаш босқичида энг яхши натижа кўрсатган жамоа ҳисобланади. Хитой футбол ассоциацияси олдимизга конкрет вазифа қўймади. Аммо биз ҳеч бўлмаганда гуруҳдан чиқишни мақсад қиляпмиз. Шунда ушбу футболчиларда ўзларига бўлган ишонч ортади", дейди Фу Бо.

Эслатиб ўтамиз, Ўзбекистон ва Хитой ёшлар терма жамоалари ўртасидаги "D" гуруҳи 1-тур баҳси Тошкент вақти билан соат 18:00да бошланади. Учрашув "Спорт" канали орқали жонли эфирда трансляция қилинади.