Қозоғистоннинг «Актобе» футбол клуби ярим ҳимоячиси Эмиль Кенжисариевни дўппослагани учун қўриқчи уч йилга озодликдан маҳрум этилди. Бу ҳақда, Олма-Ота шаҳар Медеу туман судига асосланиб, Tengrinews.kz хабар бермоқда.
Қайд этишларича, Эмиль Кенжисариев Олма-Ота тунги клубларидан бирида тан жароҳатини олган.
Хабар беришларича, қўриқчи Бейбит Узақбай «Қасддан саломатликка оғир шикаст етказиш» моддаси бўйича жавобгарликка тортилган.
Суд ҳукми 15 кун ичида кучга киради. Жавобгар томон ҳали ҳукм устидан апелляция бермаган.
Эслатиб ўтамиз, Эмиль Кенжисариев 2013 йил августида оғир тан жароҳати етказилгани ҳолда, Олма-Ота шифохоналаридан бирига ётқизилган эди.
Уни номаълум шахслар дўппослаб кетгани хабар қилинган эди. Кейинроқ эса футболчининг калтакланиши юзасидан жиноий иш очилган, иш судга оширилгани маълум бўлди.
Бу орада эса Кенжисариевнинг ўзи Исроилда жарроҳлик амалиётини муваффақиятли ўтказиб қайтди.
Маълумот учун, Эмиль Кенжисариев 2012 йилнинг биринчи ярмида Тошкентнинг «Бунёдкор» футбол клуби сафида тўп сурган.
