Ҳозирги кунда Жодино шаҳрининг (Беларусь) "Торпедо" жамоасини бошқариб келаётган Игорь Криушенко "Прессбол"га берган интервьюсида, агар бошқа мамлакат клубидан таклифлар тушса, ўз олдига фақат жиддий мақсадлар қўядиган клубга йўл олиши мумкинлигини таъкидлаб ўтди. Шунингдек, у ўзининг собиқ жамоаси "Шўртан"ни ҳам тилга олиб ўтди.

"Вариантлар доимо чиқиб туради. Лекин бу таклифлар ўз олдига жиддий мақсадлар қўймайдиган Биринчи лига жамоаларидан. Ўз олдига улкан мақсадлар қўймайдиган жамоада ишлашни истамайман. Беларусдан кетсам ҳам, жиддий натижаларга эришишни истайдиган жамоаларга йўл оламан.

Ҳозирда Жодинода ишлаяпман. Мақсад — етакчиларга муносиб қаршилик кўрсатадиган жамоани шакллантириш. "Торпедо"да ишлаш қизиқарли бўлмоқда. Меҳнатимнинг натижасини кўрмасдан туриб, кетишни истамайман.

Ёки Ўзбекистоннинг "Шўртан" жамоасини олиб қарайдиган бўлсак. Икки йил аввал бу жамоага йўл олдим ва клуб раҳбарияти билан суҳбатлашдим. Олдимизга вазифа қўйишди — чемпионатда кучли учликка кириб, Осиё чемпионлар лигасида иштирок этиш. Ишлар ёмон кетмаётган эди. Етакчилардан бироз ортда қолган ҳолда 4-ўринда бораётгандик. Кейин эса муаммолар бошланди. Ярим йил маош олмасдан ишлаш ҳеч кимга ёқмайди", дейди Игорь Криушенко.