Ўзбек спорт журналистикасида муҳим ўрин тутадиган устоз ҳамкасбимиз Владимир Ашотович Сафаров 17 январь куни ўзининг 75 ёшини қарши олди. Бу инсон мана 50 йилдан ошдики, Ўзбекистон футболи тарихини ўрганиб келади. Бу борада бир қатор китоблари чоп этилган. Бундан ташқари, у «Пахтакор» ташкил этилгани (1956 йил)дан буён клуб тарихчиси ва ашаддий мухлисидир.

Владимир Ашотович хусусан, InterFutbolда ҳам ўзининг қизиқарли мақолалари билан чиқиш қилмоқда. Айтайлик, 2012 йили футболимизнинг 100 йиллик тўйи муносабати билан унинг бутун тарихи ҳақида туркум мақолалари берилди.

Эътиборли томони, арман миллатига мансуб бу инсон бир неча йиллардан буён мусиқанинг жаз тури билан шуғулланиб келади. Ҳаттоки, ака ва укалари билан «Арцах» гуруҳини ҳам тузган.

Сафаровларнинг келиб чиқиши Тоғли Қарабоғга бориб қадалади. Бўлажак жазменларнинг боболари Александр Богданович Захарян тақдир тақозоси билан Тошкентга келиб қолган. Ўзбекларнинг меҳмондўстлиги туфайли бу инсон юртимизда қолишга қарор қилган. Агар Владимир Ашотовичнинг набираси Вартанни ҳисобга олсак, Мана, Сафаровларнинг учинчи авлоди она заминимизда дунё юзини кўрди. Улар орасида энг таниқлилари ака-ука Геннадий, Владимир ва Вячеслав Сафаровдир. Юқорида таъкидланганидек, улар Ўзбекистондан ташқарида ҳам машҳурликка эришган «Арцах» ансамблини тузишган. Сафаровлар халқ­аро жаз фестивалларида Ўзбекистондаги Арман маданияти маркази номидан иштирок этишади.

Ўз ўрнида Владимир Сафаровни жаз ихлосмандлари, футбол ишқибозлари, Ўзбекистон футбол федерацияси ва таҳририятимиз номидан таваллуд айёми билан табриклаймиз. Устоз журналистга ўзбек футболи статистикасини юритишда толмаслигини тилаймиз.

Маълумот учун

 

Владимир Сафаров қуйидаги китоблар муаллифи:

 

1. «Пахтакор»: унутилмас ўйинлар» (Тошкент, 1990 йил)

 

2. «Пахтакор»: 40 йиллик ўйин» (Тошкент, 1996 йил)

 

3. «Талант особого рода» - Геннадий Красницкий ҳақида (Тошкент, 2000 йил)

 

4. «Бетакрор истеъдод соҳиби», ўзбек тилида (Тошкент, 2000 йил)

 

5. «Футбол братьев Ан» (Тошкент, 2002 йил)

 

6. «Ан ака-укалар», ўзбек тилида (Тошкент, 2002 йил)

 

7. «Хотира қанотлари» - «Пахтакор»-79 ҳақида (А. Тазетдинова билан ҳаммуаллифликда, Тошкент, 2004 йил)

 

8. «Пахтакор-79» (А.Тазетдинова билан ҳаммуаллифликда, Москва, 2004 йил)

 

9. «Пахтакор»: ярим асрлик битиклар» (Тошкент, 2005 йил)

 

10. «Юрий Саркисян феномени: футбол ҳақида ҳаёт» (Г.Ртвеладзе билан ҳаммуаллифликда, Тошкент, 2007 йил)

 

11. «Ўзбек футболи афсонаси» - Биродар Абдураимов ҳақида (С.Данилов билан ҳаммуаллифликда, Тошкент, 2009 йил)

 

12. «Ҳаммаси жаз ҳақида» (Тошкент, 2010 йил)

 

Шунингдек, ўзбек футболи ҳақида қу­йидаги китобларга маълумотлар берган:

 

«Справочник тақвимлар» (Тошкент)

 

«Статистик тўпламлар» (Москва, Харьков, Уфа)

 

Энсклопедия: «Россия футболининг 100 йиллиги» (Москва)

 

«Футбол сайёраси» (Москва)

 

«Мустақил мамлакатлар футболи» (Таллинн, инглиз тилида)

 

«Аёллар футболи энсклопедияси» (Калуга)

 

Умуман олганда, турли нашрларда 3000дан ортиқ мақолалари чоп этилган

 

2000 йили Ўзбекистон футбол федерация­си томонидан йилнинг энг яхши журналисти, деб топилган

 

Жаз билан шуғулланади. 1954 йилдан буён фортепиано чалади

 

Тошкент жаз-клуби президенти

 

«Ака-ука Сафаровлар ва дўстлари» жаз ансамбли раҳбари

 

Ўзбекистондаги Арман маданияти маркази аъзоси