Россиянининг Сочи шаҳрида бўлиб ўтадиган қишки олимпиада мусобақаларида фигурали учиш бўйича Россия терма жамоаси аъзолари Елена Ильиних ва Никита Кацалапов жуфтлиги ўзбек миллий либосида музга чиқади. Бу ҳақда «Olamsport» нашри хабар тарқатди.

«Бу дуэт миллий мусиқамиз садолари остида ўз чиқишларини намойиш этишади. Бу ғоя спортчиларнинг устози Николай Морозов ҳамда бастакор Эдуард Каландаровдан чиққан», деб ёзади манба.

Ўтган йилнинг декабрь ойида ўтказилган Россия чемпионатида жуфтлик айнан шу кўринишда чиқиш қилган ва якунда икки дастур бўйича кумуш ва бронза медалини қўлга киритганди. «Танланган мусиқий тўпламда «Дилхирож»дан тортиб «анжанчасига»ча бор», дея қайд этилади нашр хабарида.

Эслатиб ўтамиз, Сочи олимпиадасининг очилиш маросими 2014 йилнинг 7 февраль куни маҳаллий вақт билан соат 20:14да бошланади. Ушбу улкан спорт анжуманида уч нафар ҳамюртимиз ҳам иштирок этишади. Евгений Рохин эса шорт-трек ўйинларига ҳакам сифатида таклиф этилган.