Ўзбекистон шахматчилари “Moscow Open – 2014” халқаро шахмат фестивалида муваффақиятли иштирок этмоқда.
Ўнинчи маротаба ташкил этилган нуфузли фестивалнинг талаба-гроссмейстерлар ўртасидаги баҳсида Нафиса Мўминова пешқадамлик қилмоқда. Олти давлатдан ўн нафар шахматчи бир давра тизимида ўзаро рақобатлашаётган мусобақанинг биринчи турида Н.Мўминова россиялик Варвара Саулинани қора доналарда мағлубиятга учратди. Иккинчи турнинг энг кескин ўтган баҳсида истеъдодли шахматчимиз мезбонларнинг яна бир вакили Лидия Томникова устидан зафар қучди. Нафиса учинчи партияни грузиялик Мэри Арабидзега қарши ўтказади.
“Moscow Open – 2014” фестивалининг “С” гуруҳида иштирок этаётган шахматчиларимиздан Роман Голубев россиялик Арнольд Солдатов ва Василий Майоровни, Вилдан Галямов мезбонлар вакили Игорь Улянкин ва қозоғистонлик Жандос Агмановни мағлуб этиб, пешқадамлар сафида бормоқда.
“D” гуруҳида дона сураётган ҳамюртимиз Одил Собитов ҳам дастлабки икки партияда россиялик Ришат Ракаев ва Аркадий Пастердан устун келди.
