Тошкент шаҳри яна бир катта бокс оқшомига мезбонлик қилади. 8 февраль оқшомида пойтахтимиздаги муҳташам “Ўзбекистон” спорт мажмуасида профессионал бокс кечаси ташкил этилади. Мазкур бокс кечасида 7 та жанг ўтказилиши кўзда тутилган.
Эътиборга молик жиҳати шундаки, кечанинг ринг-аноунсери вазифасини “Европанинг Майкл Баффери” номини олган россиялик Александр Загорский бажаради. Бу инсон шу пайтгача бир неча бор мамлакатимизда меҳмон бўлган. Загорский Бекобод ва Тошкентда ўтган бокс кечаларида бошловчилик қилган. Таъкидлаш жоиз, Бекободдаги бокс оқшомига бир нечта вазн тоифаси бўйича собиқ жаҳон чемпиони, Россия ва Австралия фуқаролигига эга Константин Цзю ҳам ташриф буюрганди.
8 февраль оқшомининг марказий жанги 69 кг вазн тоифасида ўтказилади ва унда ҳамюртимиз, WBA Asia Pacific, WBC International, WBO Asia Pacific чемпионлик камарлари соҳиби Шерзод Ҳусанов (18-0, 8 КО) вакант бўлиб турган IBF International камарини қўлга киритиш учун аргентиналик Карлос Жересга (58-20, 18 КО) қарши рингга кўтарилади. Табиийки, бўлажак жанг 12 раунддан иборат бўлади. Шунингдек, шанба куни 69 кг вазн тоифасида пойтахтлик Мухирбек Йўлдошев бухоролик Фаррух Файзиевга, худди шу вазнда яна бир чарм қўлқоп устамиз Равшан Худойназаров АҚШ боксчиси Мустафа Кандега, 72 кг вазнда фарғоналик Ўктамжон Раҳмонов кениялик Жеймс Огайога, супероғир вазнда андижонлик Исроил Қурбонов фарғоналик Аброр Ориповга, 63 кг вазн тоифасида арманистонлик Айк Шахназарян яна бир АҚШ вакили Жорж Оуанога, Бахт Абдураҳимов эса россиялик Руслан Берчукка қарши рингга кўтарилади.
Бокс кечаси соат 17.00да бошланиши режалаштирилган.
Айнан шу куни ОЧЛ-2014 плей-офф босқичидан ўрин олган “Локомотив” – “Ал-Қувайт” ўйинини мириқиб томоша қилиб, бемалол “Пахтакор” стадионидан “Ўзбекистон” спорт мажмуасига йўл олаверишингиз мумкин бўлади. Бокс оқшомида кўришгунча!
