Кеча "Навбаҳор" Тошкентда навбатдаги йиғинни бошлади. Мураббийлар штаби ҳамда футболчилар пойтахтдаги “Ўзбекистон” меҳмонхонасида тўпланишди.  Жамоа аъзолари айнан шу меҳмонхонада икки ҳафта истиқомат қилишади.

Таркибда эса кутилганидек янги футболчилар пайдо бўлди. Алишер Шоғуломов ва Ориф Мамажоновлар шулар жумласидандир. 1990 йилда туғилган Ориф Мамажонов ўтган мавсумни Жиззахнинг “Сўғдиёна” жамоасида ўтказиб, 22 ўйинда майдонга тушиб, иккита голга муаллифлик қилганди. Маълумот ўрнида, Мамажоновни ҳимоя чизиғида тўп суришини келтириб ўтиш жоиз.

Алишер Шоғуломов эса ўтган мавсумда “Гулистон” шарафини 20 та ўйинда ҳимоя қилиб, ўз ҳисобига битта гол ёзиб қўйганди. 1994 йилда таваллуд топган Шоғуломов ҳужумкор яримҳимоячи сифатида тўп суради.

Шунингдек, мурабийлар штабида ҳам ўзгариш рўй берганлигини эътироф этиш жоиз. Эндиликда Зоҳид Нурматов “Навбаҳор” мураббийи сифатида иш юритадиган бўлди. Ушбу мутахассис ўтган йили “Гулистон”да Бахтиёр Ашурматовга яқиндан ёрдам берганди.