Олимпиада-2014нинг олтин медали 550 долларга баҳоланди, дея хабар бермоқда Pittsburgh Post-Gazette. Мукофот нархининг унчалик қиммат эмаслигиунинг таркиби билан боғлиқ: медаль олтиндан эмас, балки кумушдан тайёрланган (525 грамм). Энг олий олимпия соврини таркибида олтин миқдори бор-йўғи олти граммга тенг – медалнинг фақат устки қатлами тилладан иборат.
Агар Сочидаги олимпия медали тўлиқ олтиндан қуйилганида эди, унинг бозордаги нархи 21 минг долларга яқин бўларди. Ҳозирги олтин медалнинг коллекцион нархи неча пулга тенг эканлиги ҳозирча номаълум.
Экспертлар Сочи Олимпиадасининг кумуш медалини 310 долларга, аслида мис, қалай ва руҳ аралашмасидан тайёрланган бронза медални эса 3 доллару 25 центга баҳолашди. Совринларни баҳолашда медалларни тайёрлашда ишлатилган металларнинг ўртача бозор нархи ҳисобга олинган.
Спортчилар соф олтиндан қуйилган олтин медаллар топширилган сўнгги Олимпия ўйинлари 1912 йили Стокгольмда бўлиб ўтганди (ўшанда спортчилар жами 109 мукофот тўплами учун кураш олиб боришган). Шу Олимпиададан сўнг спортчиларга тилла суви юритилган ва кумушдан тайёрланган олтин медаллар топширилиши бошланган.
Сочида медаллар баҳси 8 февраль куни бошланди. Ҳозирги вақтда Норвегия терма жамоаси 2та олтин медал билан умумжамоа ҳисобида етакчилик қилмоқда. Шунингдек, Голландия ва АҚШ термалари ҳисобида ҳам иккитадан олтин медал бор. Сочи-2014 ўйинларида жами 98та медал тўплами ўйналади.