Футзал бўйича XVIII Ўзбекистон Кубоги финалида қаршининг “Дўстлик-AIN” ҳамда чирчиқнинг “Максам-Чирчиқ” жамоалари куч синашадиган бўлди.

13 февраль куни пойтахтнинг “Ўзбекистон” спорт мажмуасида футзал бўйича XVIII Ўзбекистон Кубоги ярим финал баҳслари бўлиб ўтди. Куннинг биринчи учрашувида “Ўзсаноатқурилишбанк” ҳамда “Дўстлик” жамоалари финал йўлланмаси учун кураш олиб боришди. Ниҳоятда қизиқарли тарзда кечган беллашув тақдири пенальтилар сериясида ҳал бўлди. Асосий ва экстра таймларни 4:4 ҳисобида якунлаган “Ўзсаноатқурилишбанк” ва “Дўстлик-AIN” жамоалари ўртасидаги пенальтилар сериясидаги дуэли “Дўстлик-AIN”нинг 5:4 ҳисобидаги ютуғи билан якун топди.

Мусобақанинг фаворитлари бўлмиш “Максам-Чирчиқ” ва “Локомотив” клублари ўртасидаги баҳс ҳам ярим финалнинг биринчи тўқнашуви каби 4:4 ҳисобида тугади. Пенальтилар сериясида эса, чирчиқликлар 4:2 ҳисобидаги ғалабани қўлга киритишди.

Эслатиб ўтамиз, футзал бўйича Ўзбекистон Кубогининг амалдаги соҳиби “Локомотив” жамоаси бўлиб турибди, аммо “темирйўлчилар” мусобақани тарк этгач, тез орада Кубокнинг янги соҳиби номини билиб олиш имкониятига эга бўламиз.

Ўзбекистон Кубоги
13 февраль, жума
Ўзсаноатқурилишбанк (Тошкент) – Дўстлик-AIN (Қарши) 4:4 (4:5 пен.)
Максам-Чирчиқ (Чирчиқ) – Локомотив (Тошкент) 4:4 (4:2 пен.)