«Пахтакор» жамоаси билан шартномаси якунланиб, эркин агентга айланган Темурхўжа Абдухолиқов фаолиятини Сплитнинг «Хайдук» клубида давом эттиради. Ҳужумчи шу ҳафта бошида Сплит шаҳри жамоаси билан расман шартнома имзолади.
«Хайдук»нинг Туркиядаги йиғинида иштирок этган футболчининг ҳаракатлари Игорь Тудор бошчилигидаги мураббийлар штабига маъқул келди. Шу тариқа Абдухолиқов Хорватия чемпионатида ўйнайдиган биринчи ўзбекистонлик футболчига айланди. Унинг таништирув маросими ҳужумчи Хорватияга етиб боргач, ўтказилиши мўлжалланган. Таъкидлаш жоиз, Темурхўжа «Хайдук»нинг Анталиядаги йиғинида Грузиянинг «Динамо» клубига қарши ўтказилган баҳсида майдонга тушганди. Хорватия жамоасининг ғалабаси (2:1) билан якунланган ўйинда ҳамюртимиз голларнинг бирига ҳаммуаллифлик қилганди. Янги клубида Темурхўжа 15-рақамли либосда ҳаракат қилади. Биз шартнома имзоланганидан сўнг истеъдодли ҳужумчидан интервью олдик.
— Темурхўжа, аввало, Хорватия чемпионатидаги илк ўзбекистонлик футболчи бўлганингиз билан табриклаймиз. Умуман, «Хайдук» варианти қандай пайдо бўлди?
— Январь ойининг сўнгги кунлари венгриялик агентим Хорватиянинг «Хайдук» клуби томонидан қизиқиш бўлаётгани ҳақида айтиб қолди. Сплит шаҳри жамоаси мураббийлари ўйинларим ёзилган дискни кўришган экан. Шундан кейин жонли тарзда кўриш учун Туркиядаги ўқув-машғулот йиғинига таклиф қилишди. Анталияда жамоа билан тўрт кун бирга шуғулландим. Грузиянинг «Динамо» клубига қарши ўтказилган назорат ўйинида майдонга тушдим. Ҳаракатларим маъқул келди, шекилли шартнома таклиф қилишди.
— «Хайдук»дан бошқа таклифлар бўлмадими?
— Таклифлар етарлича эди. Осиё ва Европанинг иккитадан клуби менга қизиқиш билдирганди. Аммо ўша жамоалар ўқув-машғулот йиғинига чақириб, кейин шунга қараб, ўз жавобини айтишларини маълум қилишганди. «Хайдук» аниқ ва ҳар томонлама манфаатли таклиф билан чиққани учун, бошқа вариантларни кўриб чиқишга ҳожат ҳам қолмади. Менга айниқса, клубнинг уч нафар ҳужумчи билан ўйнаши маъқул келди. Таркибида ёш футболчилар кўпчиликни ташкил этади. Қолаверса, Сплит жамоаси Хорватия футболида ўз ўрни, мавқеи, шонли тарихига эга клуб ҳисобланади. Бир неча карра Хорватия чемпиони, мамлакат кубоги соҳиби бўлган. Айни пайтда чемпионатда 2-ўринни эгаллаб турибди.
— Жамоа машғулотларида иштирок этдингиз. Ўзимизнинг машғулотлар билан таққослаганда, қандай фарқ сездингиз?
— Албатта, фарқи бор. Биринчи галда футболчилар жуда кўп тер тўкишар экан. Аниқ тўп узатишларга эътибор беришади. Энг муҳими эса бу - тезлик. Жисмоний, техник-тактик тайёргарликка бирдек эътибор қаратилади. Европа жамоаларига қарши ўтказиладиган ўйинларда нимага рақиб футболчиларига ета олмаслигимизга энди жавоб топа бошладим.
— Ҳозирда «Хайдук» жамоасини Хорватия футболининг яқин ўтмишдаги машҳур футболчиси Игорь Тудор бошқармоқда. Бош мураббий сизда қандай таассурот қолдирди?
— Кўп гапирмайди. Ҳар бир сўзини териб-териб гапиради. Психолог, футболчиларни тушунади. Муҳими, диктатор эмас.
— Тил масаласида қийналмаяпсизми?
— Мураббий ва футболчилар билан инглиз тилида гаплашяпмиз. Мендан ташқари, яна бир грузиялик легионер бор. У билан бемалол рус тилида гаплашса бўлади. Бундан ташқари, жамоанинг жисмоний тайёргарлик бўйича мураббийи ҳам рус тилини тушунар экан. У ўз вақтида Киевнинг «Динамо» клубида фаолият юритган.
— Хорватия клуби билан неча йиллик шартнома имзоладингиз?
— Шартнома икки ярим йилга мўлжалланган.
— 15-рақамни танлабсиз. Бу рақам сиз учун алоҳида аҳамиятга эгами?
— Йўқ, шунчаки бўш бўлган рақамлар орасида шуниси кўпроқ ёқди. Ҳужумчиларга хос одатий рақамлар банд экан. Мен мавсум ўртасида жамоа таркибига қўшилганим учун рақамни танлашда имкониятларим чегараланганди. Бошқа томондан, ҳамиша ҳам рақам футболчининг қандай ўйин намойиш этишини белгилаб бермайди. Рақам футболчини эмас, аксинча, ўйинчи рақамни машҳур қилади.
— Жамоа таркибига қўшилишингиз билан клуб базасига жойлашасизми?
— Клуб раҳбарияти алоҳида уй ажратди. Ўша ерда яшайман. Сплитга боришни, клуб стадиони ва базасини кўришга ошиқяпман.
— Қачон «Хайдук» сафига қўшиласиз?
— Ҳозир Хорватияда ишлаш ҳуқуқини берувчи визанинг тайёр бўлишини кутяпман. Бу визани Анқарада беришар экан. Керакли ҳужжатларни топшириб келдим. Ўн кун ичида тайёр бўлишини айтишганди. Виза бироз кечикканлиги сабабли, «Сплит дербиси»ни ўтказиб юбордим. «Сплит» клубига қарши кечган сафар ўйинида жамоамиз 2:1 ҳисобида ғалаба қозонди. Айнан дербида дебютимни нишонлашни истагандим.
— «Пахтакор» футболчилари билан хайрлашишга улгурдингизми?
— Туркиядаги йиғин чоғида «Пахтакор» ҳам Анталияда машғулот ўтказаётганди. Ўшанда собиқ жамоадошларим билан кўришдик. Улар билан очиқ юз билан хайрлашдик. Бир-биримизга келгуси фаолиятимизда омад тиладик.
— Дарвоқе, айнан Анталиядаги йиғин чоғида Максим Шацких билан ҳам учрашдингиз...
— Ҳа, Ўзбекистон футболида ўзининг муносиб ўрнига эга бўлган ҳужумчи билан учрашганимдан хурсандман. Шацких ўзининг янги жамоаси билан Анталияда йиғин ўтказаётган экан. Максим ҳам менинг Европадаги фаолиятимда омад тилади, керакли тавсияларни берди. Ўйлайманки, бу кўрсатмалар Хорватия чемпионатидаги фаолиятимда асқотади.
— «Хайдук» олдига чемпион бўлиш вазифаси қўйилганми ёки шунчаки еврокубокларга бериладиган йўлланмалардан бирини қўлга киритсанглар бўлдими?
— Ўтган йили жамоа чемпионатда тўртинчи ўринни эгаллаб, еврокубокларда қатнашиш имкониятини қўлга кирита олмаганди. Хорватияда дастлабки учта ўринни банд этган клублар еврокубокларда қатнашиш ҳуқуқига эга бўлишади. Бу йил ана шу мақсадни амалга ошириш учун астойдил ҳаракат қилинади. Эшитишимча, ўтган мавсум якунларидан тегишли хулосалар чиқариб олинган. Энг олий мақсад - чемпионлик учун курашиш. Айни пайтда 22-турдан сўнг турнир жадвалида Загребнинг «Динамо» клуби 46 очко билан пешқадамлик қиляпти. Жамоамиз асосий рақибга нисбатан битта кўп ўйин ўтказган ҳолда, 41 очко билан иккинчи поғонадан жой олган. Учинчи ўриндаги «Риека» клубидан уч, пойтахтнинг «Локомотив» жамоасидан беш очкога олдинда боряпмиз. Ҳали асосий ўйинлар олдинда. Умид қиламанки, карвонбоши билан ўртадаги очколар фарқини йўққа чиқара оламиз. Навбатдаги тур учрашуви 14 февраль куни бўлиб ўтади. Шу куни «Хайдук» ўз уйида Драговоляцнинг «Хрватски» жамоасини қабул қилади.
