Хитойнинг Ханчжоу шаҳрида енгил атлетика бўйича ёпиқ биноларда Осиё чемпионати якунланди. Мусобақаларнинг иккинчи куни ўзбекистонлик спортчилар яна бир неча бор шоҳсупага кўтарилишди.

Лондон олимпиадаси финалчиси Светлана Радзивил баландликка сакраш секторида зафар қучди. У 1 метр 96 см баландликдан ошиб ўтди ва ёпиқ биноларда Осиё чемпионатлари рекордини янгилади.

Учҳатлаб сакраш мусобақасида қизларимиз барча рақибаларини ортда қолдиришди. 13 метров 60 см натижа билан Анастасия Журавлёва Осиё чемпиони унвонини қўлга киритди. Унинг жамоадоши Александра Котлярова 15 см ютқазиб, кумуш медаль соҳибасига айланди.

Шу секторда Руслан Қурбонов бронза медали билан тақдирланди. У энг яхши уринишида роппа-роса 16 метрга сакради.

Кўпкураш усталари баҳсида Юлия Тарасова иккинчи натижани қайд этган бўлса, Леонид Андреев учинчи поғонадан жой олди.

Умумжамоа ҳисобида Ўзбекистон енгил атлетикачилари тўртинчи ўринни эгаллашди. Вакилларимиз учтадан олтин ва кумуш, иккита бронза медалини қўлга киритишди.

Терма жамоамиз аъзолари Тошкентга душанба куни соат 18.55да қайтиб келишади.

Омонжон Тўхтамирзаев