Тошкентда йиғинни давом эттираётган жамоамиз якшанба ва душанба кунлари назорат учрашувларида майдонга тушди.

Дастлаб «Обод» жамоасига қарши саф тортган динамочилар Санъат Шихов, Фаррух Шотурсунов ва Искандар Холмирзаевнинг голлари эвазига 3:0 ҳисобида ғалаба қозонишди.

Душанба куни эса жамоамиз «Локомотив» клуби ёшлар жамоасига қарши саф тортишди. Қайд этиш жоиз, ушбу жамоа сафида шу куни Темур Жўраев, Илҳом Суюнов, Руслан Мельзиддинов сингари тажрибали футболчилар тўп суришди. «Темирйўлчилар» билан ўйин 1:1 ҳисобида якунланди. Жамоамиз голига Фаррух Шотурсунов муаллифлик қилди.

«Динамо» жамоаси Тошкентдаги сўнгги ўйинини 27 февраль куни ўтказиб, Самарқандга қайтади.

Пайшанба кунги учрашувда Равшан Ҳайдаров шогирдлари Наманганнинг «Навбаҳор» клубига қарши майдонга тушишади. Ушбу баҳсдан кейин жамоага 2 март кунигача қисқа таътил берилади.

Мартнинг иккинчи кунидан сўнгги тайёргарликларни Самарқанддаги қароргоҳда бошлайдиган жамоамиз машғулотларга киришади. Аксарият футболчилар билан шартнома имзоланиши режалаштирилган.

Шунингдек, март ойининг дастлабки ҳафтасида Навоий шаҳрида «Қизилқум»га қарши ўртоқлик учрашуви ўтказилиниши режалаштирилган.

Эслатиб ўтамиз, жамоамиз Олий лига 1-тур учрашувида Қаршида маҳаллий «Насаф» меҳмони бўлади. Ўйин 15 март шанба куни ўтказилади.