БАА миллий терма жамоаси 27 февралдан бошлаб Осиё кубоги саралаш босқичининг сўнгги тур баҳсига тайёргарликни бошлаган. Жамоа раҳбари Муҳаммад Обайд Ҳаммаднинг таъкидлашича, БАА Тошкентга шунчаки саёҳат учун келмоқчи эмас.

БАА миллий терма жамоаси 3 март куни кундузи Тошкентга етиб келади ва ўйингача 2та машғулот ўтказади. 3 март куни улар машғулот майдонида машқ бажаришса, 4 март куни ўйинолди расмий машғулотини 4 март куни "Бунёдкор" стадионида (34 минг мухлис) ўтказади. Маҳди Али ўтказилаётган машғулотлар жараёнида жамоанинг жанговар кайфиятини, жисмоний ва тактик жиҳатларини кўтариш устида иш олиб бормоқда. Термага янги жалб қилинган футболчилар эса ўзларини кўрсатиш учун яхшироқ ҳаракат қилишига мураббий умид қилмоқда.

БАА сўнгги 4 ой мобайнида расмий ўйинда иштирок этмаган бўлса-да, жамоа раҳбари Муҳаммад Обайд Ҳаммад ўйинчиларнинг Ўзбекистонга қарши тайёргарлик босқичига жиддий ёндошаётганидан хурсанд эканини таъкидлади. Ҳаттоки таркибда Умар Абдулраҳмон, Амир Абдулраҳмон каби футболчиларнинг йўқлиги ҳам уни хавотирга солаётгани йўқ.

"Мен ушбу футболчиларга тезроқ соғайиб, таркибга қайтишини тилайман. Осиё кубоги йўлланмасини муддатидан аввал ҳал қилиб бўлган бўлсак-да, футболчиларда Ўзбекистонни ютиш иштиёқи юқори. Навбатдаги ғалаба футболчилардаги ишончни янада оширади. Шу боис Ттошкентга шунчаки саёҳат учун бормаймиз. Кучли ўйин кўрсатиб, ғалаба билан қайтишга ҳаракат қиламиз. Тошкентдаги иқлим ҳозир биз учун ноқулай - совуқ. Шунингдек, таркибимизда айрим етакчи футболчилар йўқ. Шундай бўлса ҳам бизнинг мақсадимиз ўзгармайди", дейди Обайд Ҳаммад.

Шунингдек, БАА футбол ассоциацияси техник директори Саид Абдулқодир Ҳассан ҳам терма жамоанинг Ўзбекистон устидан ғалаба қозонишига ишонаётганини таъкидлади.

"Биз Ўзбекистонни ҳурмат қиламиз. Бу жамоа таркибида бир нечта кучли футболчилар бор. Уларнинг гуруҳда иккинчи ўринни эгаллагани ҳам яхши жамоа эканидан далолат бермоқда. Аммо биз гуруҳда юз фоизли натижа қайд этмоқчимиз. Бунга футболчиларда иштиёқ юқори", - дейди Абдулқодир Ҳассан.