Англия Лига кубоги финали орқали бугун Туманли альбиондаги илк соврин эгасини билиб оламиз. Ҳал қилувчи ўйинда "Манчестер Сити" ва "Сандерленд" ўзаро баҳс олиб боришади.

Бир қарашда номинал мезбон ҳисобланган "Манчестер Сити" ушбу тўқнашувда фаворитдек кўринади. Аммо бундай хулоса чиқаришга шошилмаслик керак. Кўпчилик ўтган йилги финални ҳали ёддан чиқармаган бўлса керак. Ўшанда "Уиган" "Сити"ни мағлуб этишнинг уддасидан чиққанди. Боз устига, "Сандерленд" финалгача бўлган йўлда "Саутгемптон", "Челси" ва "Манчестер Юнайтед"ни мусобақадан чиқариб юборганини инобатга олсак, бу қизиқарли тўқнашув гувоҳига айланамиз.

Балки, Мануэль Пеллегрини мавсум давомида ютиб олиш керак бўлган совринлар рўйхатини тузиб чиққанда Англия Лига кубоги тўртинчи поғонада қайд этилгандир, аммо барибир соврин - бу соврин. "Сити" вакиллари "Сандерленд"дан фарқли ўлароқ, финалгача бўлган йўлда жиддий рақибларга дуч келишмади. "Уиган", "Ньюкасл", "Лестер", "Вест Хэм" - бу жамоаларни "Ман Сити" билан тенглаштириб бўлмайди.

Мануэль Пеллегринининг таъкидлашича, футболчилар ўтган йилги финалдан тўғри хулоса чиқаришган. Аммо ўйинчилар "қасос олиш" кайфияти билан майдонга чиқишмайди. "Сандерленд" бош мураббийи ГУс Пойет ҳам совринни ютиб олиб, қаҳрамонга айланишни мақсад қилган. "Мендан "Сандерленд" қаҳрамони бўлишни истайсизми, деб сўрашди. Ҳа, истайман. Бунинг учун эса Кубокда ғалаба қозониш керак. Мен босим остидаман, лекин мен босимсиз ишлай олмаган бўлардим", дейди Пойет.

"Сендерленд" учун Англия Лига кубогидаги энг яхши натижа финал бўлган. 1985 йилда "қора мушуклар" ҳал қилувчи ўйинда "Норвич"га ютқазишган. "Манчестер Сити" эса 1970 ва 1976 йилларда ушбу совринни қўлга киритган. Замонавий "Сити" эса ҳали бундай Кубокка эга чиқмаган.

Ушбу жамоаларнинг ўзаро сўнгги 7та ўйинида "Сандерленд" 4та ғалаба эришган. Премьер-лига доирасида биринчи даврада бўлиб ўтган ўйинда "шаҳарликлар" 0:1 ҳисобида имкониятни бой беришган.

"Сити" мухлислари ўзларининг асосий ҳужумчилари — Серхио Агуэронинг майдонга қайтишини интизорлик билан кутишмоқда. Аргентиналик футболчи бешта ўйинда жамоасига ёрдам бера олмади. Шунингдек, жароҳат олган Стеван Йоветич ва Матия Настасич бугунги учрашувда майдонга туша олишмайди. "Сандерленд" эса Кирен Вествуд (жароҳат) ва Лиам Бридкатт (Англия Лига кубоги доирасида "Брайтон" сафида майдонга тушган) хизматларидан фойдалана олмайди.

Учрашув Тошкент вақти билан соат 19:00да бошланади. Баҳсни сайтимиз орқали матнли онлайн трансляция қиламиз.

Англия Лига кубоги, финал. "Уэмбли". 19:00
"МАНЧЕСТЕР СИТИ" - "САНДЕРЛЕНД"
Бош ҳакам: Мартин Аткинсон