Ўзбекистон ва "Анжи" клуби ярим ҳимоячиси Одил Аҳмедов терма жамоа машғулот жаарёни ва БААга қарши кечадиган ўйин ҳақида ўз фикрларини билдириб ўтди.

"Бугундан машғулотларга қўшилдим (суҳбат 2 март куни уюштирилган). Жароҳатим сабаб кўп вақт майдон ташқарисида бўлдим. Табиийки, бу ҳолат ўз таъсирини ўтказмай қолмайди. Лекин ҳозир аста-секин спорт формасига кириб боряпман. Европа Лигаси доирасида «Генк» клубига қарши 2та расмий ўйинда майдонга тушдим. Қолаверса, Туркиядаги йиғинимизда бир нечта назорат учрашувлари ўтказдик. Ўйлайманки, энди ҳаммаси яхши бўлади. Насиб қилса, 5 март куни БАА терма жамоасига қарши ўйинда чиройли ғалабани қўлга киритиб, мухлисларимизга қувончли онларни тақдим этамиз. Шахсан мен учун майдоннинг қайси чизиғида ҳаракатланишнинг унчалик фарқи йўқ. Айниқса, миллий жамоа либосида майдонга тушганда. Муҳими - жамоага фойдам тегиши. Шу ўринда ишқибозлардан 5 март куни «Бунёдкор» стадионига келиб, футболчиларни қўллаб-қувватлаб туришларини сўрайман. Уларнинг ишончларини оқлашга астойдил ҳаракат қиламиз", дейди Одил Аҳмедов.