«Манчестер Сити» ярим ҳимоячиси Самир Насри баёнот бериб, жамоадоши Яя Туре етарли даражада қадрланмаётганини ва бунинг сабаби сифатида футболчининг африкалик эканини таъкидлади.

«Агар Яя Туре африкалик бўлмаганида, у ҳозир жаҳоннинг энг яхши ярим ҳимоячиси сифатида эътироф этилаётган бўларди. Майдонда у барча ишни қилади — гол уради, ҳимояда ўйнайди ва ҳужум қилади. У тўп билан жуда кучли ҳаракат қилади. Туренинг ўйинидан фақат ҳайратланиш мумкин, у буюк футболчи.

Балки мен холис фикр билдирмаётгандирман, ҳар ҳолда Яя менинг дўстим. Лекин мен учун Яя Туре жаҳоннинг энг кучли 3 нафар ярим ҳимоячиси сафига киради. Табиийки, унинг Кот-д'Ивуардан эканлиги Туренинг зарарига ишламоқда. Агар у аргентиналик ёки бразилиялик бўлганида, барча у ҳақида гапиришган бўларди.

Бразилияликлар ҳақида ёмон фикр билдирмоқчи эмасман, лекин уларга фақатгина фуқаролиги учун 40-50 миллион тўлашмоқда. Яя Туре сингари таянч ярим ҳимоясида ўйнайдиган ва бир мавсумда 16-17та гол урадиган бирорта футболчининг номини менга  айтингчи», – дейди Насри.