Голландия терма жамоаси бош мураббийи Луи ван Гал Парижда ўтказилган ўртоқлик ўйинида Франция термасидан учралган мағлубиятдан сўнг (0:2) ўз фикрларини билдирди.

"Биз дастлабки 25 дақиқа давомида устунлик қилдик, аммо гол ўтказиб юборгач ўз ўйинимизни йўқотиб қўйдик. Франция таркибида ажойиб ўйинчилар бор, аммо биз мағлубиятга учрамаслигимиз керак эди. Айниқса майдон марказида тўпни жуда кўп йўқотдик.

Бугун энг тажрибали жамоамиз ҳаракат қилди дея олмайман, аммо иккинчи таймда тактик интизом ҳисобига яхшироқ ўйнадик, бир қатор вазиятлар яратдик. Лекин энди кеч бўлган эди.

Бундай ўйин билан Бразилияда ҳеч нарса қила олмаймиз", - деди ван Гал.

Эслатиб ўтамиз, ЖЧ-2014да "учар голландлар" Испания, Чили ва Австралия билан бир гуруҳдан олган.