Жорий йилнинг 6-16 март кунлари АҚШнинг Индиан-Уэллс шаҳрида теннис бўйича анъанавий тарзда ўтказилиб келинадиган “BNP Paribas Open” халқаро турнирининг асосий тўр баҳслари ўтказилади.

Эркаклар ўртасида 39-бор ўтказилаётган турнирнинг мукофот жамғармаси 4.720.380 АҚШ долларини ташкил этиб, асосий тўр баҳсларида жами 84 нафар ракетка усталари ғолиблик учун баҳсларга киришадилар.

Дунёнинг етакчи теннисчилари иштирокида ўтадиган мазкур нуфузли мусобақада Ўзбекистоннинг биринчи рақамли теннисчиси Денис Истомин ҳам асосий тўрдан иштирокини бошлайди. Биринчи босқичда ҳамюртимиз чехиялик Радек Штепанекка қарши кортга тушади. Ушбу учрашувда ғолиб чиққан теннисчи иккинчи даврада турнирнинг амалдаги ғолиби Рафаэль Надаль (Испания, 1) билан куч синашади.

Эслатиб ўтамиз, 2013 йили ўтказилган мазкур турнирда Денис Истомин биринчи босқичда канадалик Вашек Поспишилни 7-6, 6-3 ҳисобида мағлуб этиб, иккинчи даврада Рожер Федерерга 2-6, 3-6 ҳисобида имкониятни бой берган эди.

2012 йилги турнирда Денис Истомин тўртинчи босқичга қадар етиб борган. Биринчи даврада Лу Ень-Хсунни (Х.Тайпейи) 7-6, 6-3, иккинчи даврада Хуан Игнасио Челани (Аргентина) 7-6, 6-7, 7-5, учинчи даврада Давид Феррерни (Испания) 6-4, 6-3ҳисобида мағлуб этган ҳамюртимиз тўртинчи босқичда Хуан Мартин дель Потрога 6-7, 7-6, 2-6 ҳисобида имкониятни бой берган.