Келаси йилнинг январь ойида бўлиб ўтадиган Осиё кубоги мусобақасига қуръа ташлаш маросими 26 март куни Австралиянинг Сидней шаҳрида бўлиб ўтади. Қуръа жараёнида жамоалар 4та саватчага ажратилишади.

Ўзбекистон терма жамоаси кеча БАА билан дуранг ўйнагани эвазига 1-саватчадаги ўрнини сақлаб қолди. Акс ҳолда, жамоамиз 2-саватчага тушиб кетган бўларди. Австралия кеча Эквадор билан бўлган ўртоқлик ўйинида 3:4 ҳисобида мағлуб бўлгани боис (биринчи бўлимдан кейин 3:0 ҳисобида ютаётганди), ФИФАнинг март ойидаги рейтингида пастга тушиб кетади. Аммо мезбон жамоа бўлгани учун 1-саватчада бўлади. Шунингдек, энг юқори саватчадан Эрон ва Япония терма жамоалари ҳам ўрин олишди. Демак, Ўзбекистон терма жамоаси қуръа пайтида 1-саватчанинг бошка вакиллари билан бир гуруҳга тушмайди.

Иккинчи саватча ҳам анча кучли жамоалардан ташкил топган: Жанубий Корея, БАА, Иордания ва Саудия Арабистони. Учинчи саватчадан Уммон, Хитой, Қатар ва Ироқ ўрин олган бўлсам, тўртинчи саватчадан ҳозирча 3та жамоа бор: Баҳрайн, Кувайт ва КХДР. Тўртинчи жамоа номи май ойида бўладиган ОФК Чақирув кубогидан кейин маълум бўлади.

Осиё кубоги-2015 қуръаси саватчалари таркиби:
1-саватча: Австралия, Эрон, Япония, Ўзбекистон
2-саватча: Жанубий Корея, БАА, Иордания, Саудия Арабистони
3-саватча: Уммон, Хитой, Қатар, Ироқ
4-саватча: Баҳрайн, Кувайт, КХДР, ОФК Чақурув кубоги-2014 ғолиби

ФИФАнинг март ойидаги рейтинги 13 март куни эълон қилинади. Шундан сўнг ОФК саватчалар таркибини расман эълон қилади.