Хабарингиз бор, ЎФФ расмий сайти ҳисобланган www.the-uff.com жорий йил бошидан буён фаолият юритмаяпти. Ташкилот матбуот хизмати муҳим хабар ва янгиликларни, шунингдек, расмий баёнотларни ҳам твиттердаги саҳифаси орқали бериб бормоқда. Шу билан биргаликда, терма жамоалар фаолиятига оид муҳим янгиликларни оммага тақдим этишда ПФЛ расмий сайтидан ҳам фойдаланилмоқда.
Кеча шу ҳақда изоҳ берган ЎФФ матбуот хизмати расмий сайтнинг икки ойдан кўпроқ вақт давомида ишламаётганига хостинг билан боғлиқ муаммолар сабаб бўлганини маълум қилди. Қайд этилишича, профилактика ишлари ижобий самара бермаган ва эндиликда ЎФФ расмий сайти янгидан ташкил қилинади. Айни пайтда сайтнинг янги контенти, дизайнини ясаб берадиган мутахассислар билан музокаралар олиб борилмоқда. "ЎФФ расмий сайтининг контенти ва дизайни билан ишлайдиган гуруҳ билан шартнома тузилиб, иш бошлангач, бу ҳақда шу ерда хабар берамиз", - деб ёзади матбуот хизмати. Муаммолар айнан қанча вақт ичида бартараф этилиши мумкинлиги борасида маълумот берилмаган.
Қўшимча қилинишича, расмий сайт ишга тушгунча расмий хабарларни ЎФФ расмий твиттери орқали олиш мумкин. "Туғдирилган ноқулайлик учун узр сўраймиз", - дейилади @UzbekistanFF саҳифаси орқали қолдирилган қайдда.
