17 март куни футзал бўйича XVIII Ўзбекистон миллий чемпионатининг ярим финал босқичи биринчи кун учрашувлари бўлиб ўтди.
Дастлабки ўйинда андижоннинг “Турон-С” ва қаршининг “Дўстлик-AIN” жамоалари баҳслашишди. Қизиқарли тарзда кечган учрашув, “Турон-С” жамоасининг 4:3 ҳисобидаги ғалабаси билан якун топди. Айтиш жоиз, ўйинни ғолиб сифатида тарк этиш андижонликлар учун осон бўлгани йўқ. Ушбу йилги чемпионат дебютанти – “Дўстлик-AIN” учрашув давомида 0:4 ҳисобида рақибидан ортда қолаётганиг бўлса ҳам, курашни оҳирги дақиқаларга қадар олиб борди ва шунинг эвазига 3та гол уришга муваффақ бўлди.
Демак, ушбу жуфтлик орасида финал йўлланмасини қўлга ким киритиши катта сўроқ остида деб айта оламиз. Эртага бўлиб ўтадиган жавоб учрашувида “Дўстлик-AIN” бор имкониятини ишга солиши аниқ. Ўз навбатида, андижонлик футзалчилар ҳам “Дўстлик-AIN”ни яна бир бор мағлуб этиш учун бор кучлари билан ҳаракат қилишади.
Бугунги учрашувнинг қаҳрамони деб эса, “Турон-С”нинг тажрибали аъзоси Ғулом Мамажоновни кўрсатишимиз мумкин. Айнан Мамажонов муаллифлик қилган 3та гол, “Турон-С”га ғолиб бўлишда жуда катта ёрдам берди.
Эслатиб ўтамиз, Ўзбекистон чемпионатининг ярим финал босқичи Тошкент Давлат Молия институти спорт мажмуасида ўтказиляпти.
Ўзбекистон чемпионати
Ярим финал (Дастлабки учрушув)
17 март, душанба
Турон-С – Дўстлик-AIN 4:3 (3:0)
Голлар: Мухтор Абдукаримов (2), Ғулом Мамажонов (4, 21, 24) – Шерзод Мустафоев (32), Алишер Ибрагимов (34, 40)
Ўзбекистон чемпионати
Ярим финал (Жавоб учрашуви)
18 март, сешанба
Дўстлик-AIN – Турон-С
Ўйин вақти: 13:00
