Осиё Чемпионлар лигаси 3-тури доирасидаги “Бунёдкор” – “Фулад” учрашуви олдидан қизиқарли фактларни эътиборингизга ҳавола қиламиз.
- “Бунёдкор” бунгача Эрон клублари билан 12 марта рўбарў келган. Ўтказилган баҳсларнинг 5тасида “Бунёдкор”, 3таси Эрон клублари (“Сепахон” ва “Зоб-Ахан” икки марта) ғолиб чиқишган. Қолган тўрт учрашувда кучлар тенг келган (“Пирузи”, “Сайпа” ва “Сепахон” икки марта). Тўплар фарқи – 18:14, “Бунёдкор” фойдасига.
- Ўзаро ўйинларда энг кўп майдонга тушган футболчи ҳақида гап кетганда Азизбек Ҳайдаровни айтиб ўтиш даркор. Ҳозирги пайтда БАА чемпионатда фаолият юритаётган ҳамюртимиз эронликларга қарши “Бунёдкор” сафида 11та учрашув ўтказган.
- “Бунёдкор” сафида тўп тепган чилилик ҳужумчиси Хосе-Луис Вильянуэва ўзаро ўйинларда энг кўп тўп киритган футболчи ҳисобланади. Хосе эронликларга қарши атиги икки баҳсда майдонга тушган бўлса-да, рақиб дарвозасига 4та гол уришни уддасидан чиққан.
- “Қалдирғочлар”нинг Эрон клублари билан ўзаро ўйинларини эслаб ўтарканмиз, 2009 йилнинг 27 май санасида бўлиб ўтган “Пирузи” – “Бунёдкор” баҳсига тўхталиб ўтмасак бўлмайди. Боиси ўша учрашувни томоша қилиш учун “Озоди” стадионига 95225 нафар мухлислар ташриф буюрган ва бу кўрсаткич Осиё Чемпионлар лигаси тарихида ўзига хос рекорд ўрнатган эди.
- “Фулад” жамоаси Осиё Чемпионлар лигаси тарихида Ўзбекистон клублари билан 2006 йилда рўбарў келган. Ўшанда эронликлар “Пахтакор” билан куч синашишиб, ҳар иккала баҳсда ҳам мағлуб бўлишган. Тошкент 2:0, Эронда 1:3.
- “Бунёдкор” ва Эрон клублари қарама-қаршилигига илк бора қувайтлик бўлган бош ҳакам тайинланди. Бунгача “қалдирғочлар”нинг форсларга қарши баҳсларида Тома Масааки ва Тожи Минору (иккаласи Япония), Ал-Марзуқи (БАА), Абдуллоҳ Балидек икки марта (Қатар), Сун Баожи икки марта (Хитой), Ким Дон Жин ва Мён Ёнг Чой (иккаласи Корея Республикаси) ва баҳрайнлик Наваф Шукрулла каби реферилар бошқариб боришган.
- “Фулад” ҳозирча Осиё Чемпионлар лигасида саккизта учрашув ўтказган. Шуларнинг 4тасини уйда ва шунчасини сафарда. Эътиборлиси, ахвазликлар ҳали меҳмондаги ўйинларда ғалаба қозона олишмаган. 4 ўйин, 2 дуранг ва 2 мағлубият. Тўплар фарқи – 0:4.
- “Бунёдкор”нинг “Фулад”га қарши Тошкентдаги баҳси “қалдирғочлар”нинг Осиё Чемпионлар лигаси тарихидаги 55-учрашуви сифатида қайд этилади. “Бунёдкор” ҳисобида 22та ғалаба, 16та дуранг ва 16та мағлубият бор. Тўплар фарқи – 68:64.
- “Бунёдкор” тарихида Осиё Чемпионлар лигасида тўп тепган энг ёши кичик футболчи Сардор Собирхўжаев сариқ карточкалари сони иккитага етганлиги боис “Фулад”га қарши ўйинни ўтказиб юборади.
- “Бунёдкор” – “Фулад” учрашуви олдидан “қалдирғочлар”нинг уч нафар – Хайрулла Каримов, Дилшод Жўраев ва Вохид Шодиев каби ўйинчиларида биттадан сариқ карточка бор. Футболчиларимизни эхтиёткорликка чақириб қоламиз.
- “Фулад”да эса бундай ўйинчилари сони 5та. Булар: 2-рақамдаги Леандро Падовани, 8.Исмоил Шарифат, 10.Абдуллоҳ Карими, 14.Шаҳоб Карими ва 37.Ғуломризо Ризои.
Баҳодир МИРЗАЕВ тайёрлади.
