Шу кунларда Грузия пойтахти Тбилиси шаҳрида дзюдо кураши бўйича Гран-При туркумига кирувчи халқаро турнир ўтказилмоқда.

Дунёнинг 24 давлатидан келган 192 нафар (117 нафар эркак – 75 нафар аёл) спортчи иштирокида ўтаётган мазкур мусобақага терма жамоамиз мураббийлари уч нафар ёш спортчимизни жалб этишди.

Оғирлик вазни 73 кг.гача бўлган полвонлар беллашувида татамига чиққан ҳамюртимиз Ғиёсжон Бобоев биринчи баҳсда туркманистонлик Арслон Нурмуҳамедовни енгиб, иккинчи беллашувда Виктор Сквортов (БАА)га имкониятни бой берди.

Қизлар мусобақасида иштирок этган Гулноза Матниёзова (-70 кг) ҳам афсуски совринли ўринларни банд эта олмади. Ўтиш мусобақасида мағлубиятга учраган Гулноза якунда 7-ўрин билан кифояланди.

22-23 март кунлари оғир вазндаги полвонлар ўртасида мусобақалар ўтказилади. Мазкур мусобақада яна бир юртдошимиз Камолиддин Холматов (-90 кг) ғолиблик учун татамига чиқади.