Қозоғистон Премьер-лигасининг ўз сафида икки нафар ўзбекистонлик футболчиларга эга бўлган "Шахтёр" ва "Актобе" жамоалари ўзаро Қарағандада куч синашишди. Учрашувда 1:1 ҳисоби қайд этилди.
"Кончилар" сафида Камолиддин Мурзоев ўйинни асосий таркибда бошлади ва 56-дақиқагача тўп сурди. Шавкат Саломов эса 63-дақиқадан бошлаб майдонда ҳаракат қила бошлади.
Актобеликлар сафидаги ҳар иккала футболчимиз мазкур ўйинда майдонга тушишмади. Темур Кападзе кичик жароҳат боис ўйин қайдномасига киритилмаган бўлса, Гейнрих захирада қолдирилди.
Бугунги дурангдан сўнг Виктор Кумиков шогирдлари дастлабки очкони ўз ҳисобларига ёзишган бўлса, "Актобе"нинг очколари 4тага етди.
"Иртиш" эса Премьер-лига дебютанти "Спартак" меҳмони бўлди. Бу ўйинда ҳисоб очилмади. Улуғбек Бақоев 90 дақиқа майдонда ҳаракат қилди.
