Хитой Тайпейида таэквондонинг WTF йўналиши бўйича ўсмирлар ўртасида ўтказилган мусобақада ўзбекистонлик Умида Абдуллаева олтин медални қўлга киритди. Бу ҳақда 24 март, душанба куни «Туркистон-пресс» НАА хабар берди.
ЎзАнинг ёзишича, қизлар ўртасидаги вазни 63 килограммдан юқори бўлган спортчилар баҳсида Ўзбекистон шарафини ҳимоя қилган Умида Абдуллаева Баҳрайн, Мексика, Украина ва АҚШ вакилларини мағлубиятга учратиб, олтин медаль ва 2014 йилнинг 16-28 август кунлари Хитойнинг Нанкин шаҳрида бўладиган II ўсмирлар Олимпиадаси лицензиясини қўлга киритди.
Эслатиб ўтамиз, бугунги кунгача Нанкин-2014 ўсмирлар Олимпиада ўйинларига академик эшкак эшиш спорт турида Юлдуз Кулгавая ва Шаҳбоз Абдужабборов, дзюдочимиз Суҳроб Турсунов, ўқ отиш спорт турида Вадим Скороваров ва Владимир Свечников, шунингдек, бадиий гимнастика бўйича — 7та, оғир атлетика терма жамоамиз — 3та, байдарка ва каноэда эшкак эшиш бўйича терма жамоамиз 1 та йўлланмага эга бўлишган.
Ўзбекистон Миллий олимпия қўмитаси матбуот хизмати хабарига кўра, 2014 йилги мавсумда ўзбекистонлик спортчилар эркин, юнон-рум ва хотин-қизлар кураши, спорт гимнастикаси, трамполин, бокс, енгил атлетика, сузиш, қиличбозлик, триатлон каби спорт турлари бўйича нуфузли мусобақаларда иштирок этиб, олимпия йўлланмалари учун курашади.
