Кеча Тошкентдаги “Юнусобод” спорт мажмуасида футзал бўйича Ўзбекистон Кубоги финал баҳси ўтказилгани ҳақида хабар берган эдик. Финалда “Максам Чирчиқ” “Дўстлик Аин”ни 4:2 ҳисобида мағлуб этиб, 2014 йилги Кубок соҳибига айланди.

Эътиборли томони, ушбу ўйин “Максам Чирчиқ” сардори Баҳодир Аҳмедов учун ўйинчилик фаолиятидаги сўнгги учрашув бўлди. Эндиликда у футзал бўйича Ўзбекистон терма жамоаси бош мураббийи сифатида фаолиятини давом эттиради.

Қайд этиш жоиз, Баҳодир Аҳмедов футзал бўйича Ўзбекистон чемпионатининг барча мавсумлари иштирокчиси саналади. Уйинчилик фаолияти давомида 9 карра Ўзбекистон чемпиони, 8 маротаба Кубок соҳибига айланган.

Ўзбекистонда хизмат кўрсатган спортчи Баҳодир Аҳмедов футзал бўйича Осиё Чемпионатларидаги иштироки бўйича ҳам рекордчи ҳисобланади. Баҳодир Аҳмедов 13 маротаба ўтказилган футзал бўйича Осиё Чемпионатларининг 11тасида иштирок этган Осиёлик ягона спортчи ҳисобланади.

Баҳодир Аҳмедов ўйинчилик фаолиятидаги сўнгги соврини билан.