"Нефтчи" - "Қизилқум" учрашувидан кейинги матбуот анжуманининг иккинчи қисмида фарғоналиклар бош мураббийи Мурод Исмоилов иштирок этди.

Мурод Исмоилов (“Нефтчи” бошмураббийи):
"Ўйин ҳар иккала жамоа учун ҳам оғир кечди. “Қизилқум” жамоаси Фарғонага бир ҳафта олдин келиб, яхши тайёргарлик кўришганини айтиб ўтиш жоиз. Ўйин ҳақида гапирадиган бўлсам, кўп имкониятлардан фойдалана олмадик. Бизга вазиятларни якунлашда озгина совуққонлик етишмади, деб ўйлайман. Захирадан майдонга тушганлар ичида Смоляченко ва Фомин ўйинга киришиб кета олишмади. Зоҳид Абдуллаевда бир қанча имкониятлар бўлди. Жамоамизда ўйинни ўз қўлига оладиган етакчи уйинчи етишмаётгандек туюляпти. Мелзиддинов ҳам, Оника ҳам етакчилик ролини бажара олишмаяпти. Кейинги уйинларда ғалаба қозонишга ҳаракат қиламиз".