Ўзбекистон Кубоги доирасида Наманганнинг Уйчи туманида ўтказилган «Хотира-79» ва «Косонсой» клублари ўртасидаги учрашувни стадионда томоша қилган меҳмон жамоа мухлислари ўйингоҳдаги шароитни танқид қилган. Бу ҳақда Daryo.uz хабар бермоқда.

Хусусан, «Uff.uz» сайтининг Uefacom никли фойдаланувчиси Уйчидаги стадион борасида қуйидагича фикр билдирган: «Ўзбекистон Кубоги доирасида «Хотира-79» (Уйчи) ва «Косонсой» жамоалари ўртасида кечган ўйинга чиптани 3000 сўмдан сотиб олдик. Стадион аҳволи ва ундаги воқеалар ҳақида эса кино олса бўлади. Стадионнинг фақат бир томонида ўриндиқлар бор. У ердан мезбон жамоа мухлислари ўрин олди. Ўйингоҳнинг иккинчи томонида эса майдонга 2 метр етмай теннис корти қурилган”.

«Теннис корти панжара билан ўралган бўлиб, биз — косонсойлик мухлисларни ҳуқуқ-тартибот ходимлари корт панжарасига киритиб, устимиздан қулфлаб қўйди. Ўйинни тик турган ҳолатда, панжара ортидан кузатдик. Стадион ичига ҳам корт қурадими? Ҳатто футболчилар аутдан тўпни ўйинга киритишида ҳам корт панжараси ҳалақит қилади. ПФЛга «раҳмат», шундай ўйингоҳда Кубок ва Биринчи лига ўйинларини ўтказишга рухсат бергани учун», – дея қўшимча қилади мухлис.

Эслатиб ўтамиз, «Хотира-79» ва «Косонсой» клублари ўртасида кечган учрашувда уйчиликлар 2:0 ҳисобида ғалабага эришган эди.