Кеча мамлакат биринчилигининг биринчи турида Самарқанддаги Олимпия захиралари тайёрлаш коллежи стадионида бўлиб ўтган ва мезбонларнинг 2:0 ҳисобидаги ғалабаси билан якунланган “Регистон”-“Машъал-2” учрашуви ҳақида олдин ҳам хабар берган эдик.

Ушбу учрашув бошқаларидан камдан-кам кузатиладиган ҳодиса билан ёдда қолди. Стадионда миллий биринчилик очилиш маросими олдидан, электр чироқлари ўчиб қолган эди.

Шунда ҳам мутасаддилар ўйин олдидан футболчиларни қизғин табриклаб, биринчиликни очиқ, деб эълон қилишди ва чемпионат байроғи кўтарилди. Анъанага кўра, бундай пайтда - байроқ кўтарилаётганда миллий мадҳиямиз фоногораммаси қўйилиб туради. Электр бўлмагани сабабли, фонограммани қўйишнинг имкони бўлмади. Стадионга йиғилган кам сонли мухлислар, футболчилар ва ҳакамлар мадҳиямизнинг сўзларини айтиб туришди.

Ушбу воқеанинг юртимиз электрон оммавий ахборот воситаларида тарқалиб кетганини “Регистон” футбол клубининг ва самарқандлик бошқа мухлислар оғир қабул қилишганидан воқиф бўлдик.

“Олимпия”да ўша куни ўйин ёмғир остида бўлиб ўтди. Ўйиннинг бошланиш вақти ПФЛ томонидан соат 16:00 га аниқ қилиб белгилаб берилган. Чироқ йўқлиги сабабли ўйинни суриш қониқарли сабаб бўла олмайди. Боз устига, чироқ ўйиннинг 10-дақиқаларида пайдо бўлди ва ўйиндаги жамоалар таркиби ва ўзгаришлар вақтида эълон қилиб борилди.

Аслида, стадионларда ўйин олдидан ёки ўйин вақтида чироқ ўчиши жуда ғайритабиий ҳодиса ҳисобланмайди. Ўтган йили Ўзбекистон ва Иордания терма жамоалари ўртасида Тошкентдаги “Пахтакор” стадионида бўлиб ўтган Жаҳон чемпионати саралаш учрашувида ҳам чироқ ўчиб қолганию, бу ҳодисадан ўйинни тўғридан-тўғри эфирда томоша қилаётган бутун жаҳон афкор оммаси хабар топганини ҳам шундай воқеалар сирасига киритиш мумкин.

Европанинг кучли бешлик чемпионатлари ўйинлари давомида ҳам чироқ ўчиб қолиш воқеасига тез-тез дуч келамиз.

Қолаверса, мадҳиянинг фонограммаси қўйилмасдан, футболчилар томонидан оғизда жонли куйлангани ҳам Самарқанд учун янгилик эмас. 1999 йилнинг 11 июлида айнан Самарқандда бўлиб ўтган ва 3:0 ҳисобида якунланган Ўзбекистон миллий терма жамоасининг Малайзия терма жамоасига қарши учрашувида ҳам Малайзиянинг гимни топилмагач, малайзиялик футболчилар жонли овозда ижро этишган эди.

Хуллас, “Олимпия” стадионида чироқ бўлмаса ҳам, шу куни стадионда мадҳия жонли ижро этилди ва чемпионат байроғи кўтарилди. Бу кичик техник муаммо футболчиларнинг ҳам, мухлисларнинг ҳам кайфиятига таъсир кўрсата олгани йўқ - “Регистон” жуда чиройли иккита гол киритди.

Яна бир жиҳат: Самарқанднинг Биринчи лигада иштирок этаётган иккинчи жамоаси - “Шердор” ҳам ўйинларини “Олимпия” стадионида ўтказади. Биринчи лиганинг 1-2-турларида “Шердор” меҳмонда тўп сурди.

Учинчи турда “Шердор” 11 апрель куни Косоннинг “Аланга” жамоасини қабул қилади. “Шердор” учун Самарқандда футбол мавсумини очиш учун алоҳида очилиш маросими ўтказилади ва “Олимпия”да мадҳия садолари остида яна чемпионат байроғи кўтарилади.