Олий лига 5-туридан ўрин олган "Металлург-"Навбаҳор" ўйинидан сўнг (2:0) Наманганликлар устози Бахтиёр Ашурматов журналистлар саволларига жавоб берди.

- Ноқулай об-ҳавога қарамасдан ўйин қизиқарли кечди. Иккала томон ҳам майдоннинг ҳар бир қарич учун курашди.  Ўйинга келсак, бугун "Металлург" кучли эди, буни тан оламиз. Ўйинан аввал ўйинчиларимга "Металлург"нинг сўнгги мағлубиятларига эътибор бермасликни, ўйин жуда кескин кечиши ҳақида огоҳлантирган эдим. Йигитлар бунга ҳаракат қилиши, аммо боя айтганимдай, рақиб кучли ўйин намойиш қилди.

- Мағлубиятга ноқулай об-ҳаво сабабчи деб ўйлайсизми?

- Йўқ, баҳона қидирмайман. Мағлубиятга об-ҳаво ҳам, футболчилар ҳам айбдор эмас. Бош мураббий сифатида ўзим жавобгарликни бўйнимга оламан. Йигитлар ҳаракат қилишди. Улар, масалан, мен жамоага келгандан буён маош олганлари йўқ. Шунга қарамай, очко йиғиб, совринли ўринлар учун курашяпмиз. Агар биз юқори натижалар кўрсатмоқчи эканмиз, жамоага янада яхшироқ эътибор берилишини истаган бўлар эдим. Шу ўринда бугун стадионга ташриф буюрган 150га яқин наманганлик мухлисларга алоҳида ташаккур айтмоқчиман, улар ўйин тугагандан сўнг ҳам бизни олқишлашди. Уларнинг ишончини қозониш учун қўлимиздан келганча ҳаракат қиламиз.