Олий лига 5-туридан ўрин олган "Металлург-"Навбаҳор" ўйинидан сўнг (2:0) Бекободликлар устози Рустам Мирсодиқов журналистлар саволларига жавоб берди.
- Ўйин қизиқарли кечди. Ўйиндан аввал йигитлардан аввалги ўйинлар натижасини ёддан чиқарган ҳолда тўп суришларини сўраган эдим. Албатта кетма-кет мағлубиятлардан сўнг одамда ўзига бўлган ишонч ҳам йўқола боради. Футбол "югур-теп"дан иборат эмас, йигитларга ўйинда ўз "имзо"ларига эга бўлишни таъкидлаб келаман. Аввалги учрашувларда ҳам жамоа ёмон ҳаракат қилмаган эди. Бугун ортга йўл йўқ эди, яхши, йигитлар буни тўғри ҳис қилишди ва биринчи ғалабага эришдик.
- Асосий таркибнинг ўйинчиларидан бири Саидкомил Акбаров майдонга тушмаётганининг сабаби нимада?
- Туркиядаги йиғинимизда Акбаров шамоллаб ўн кун машғулотларда иштирок этмади. Шу сабабли ўйинларда Ҳикмат Ҳошимовни орқароққа ўтказдим, ўз навбатида Дилмурод Каримов ҳам орқароқда тўп сурмоқда. Жамоанинг ўйинидан қониқаётганим учун шу таркиб билан чекланяпман. Саиднинг ҳам навбати келади.
