“Андижон” ва “Динамо” жамоалари ўртасидаги учрашувдан ўтказилган матбуот анжуманининг биринчи қисмида меҳмонлар устози Равшан Ҳайдаров иштирок этиб ўйин тўғрисида ўз фикрларини билдирди.

— Бугун қизиқарли ва мухлисларга ёқадиган  ўйин бўлди, деб айта оламан. Майдоннинг ҳолати ўйинга халақит берса керак деб ўйлагандим. Аммо шунга қарамай, бугун шундай майдонда ҳам иккала жамоа яхши ўйин кўрсатишга ҳаракат қилди. Учрашув жанговор ва голларга бой бўлди. Тўғри, бундай майдонда ўйланган комбинациялар амалга ошмаган бўлса-да, кескин кураш кечди. Бугун омад бизга кулиб боққани боис ғалабани илиб кетдик. Лекин бунинг акси бўлиши ҳам ҳеч гап эмасди. Чунки 1:0 ҳисобида ғалаба қозона туриб, дарвозамиздан иккита тўп ўтказиб юбордик. Шунга қарамай, охиригача курашдик.

Ҳар ўйинда майдонга ғалаба учун тушамиз. Жамоага яхши ўйинчилар йиғилган, шунингдек, мавсумга тайёргарлигимиз ҳам ёмон бўлмади. Бугунги учрашувдан олдин таркибимизда муаммолар бор эди. Яъни, жароҳатлар кўпайиб кетганди. Акмал Холмуродов, Зайниддин Тожиев ва Аваз Агалиевда жароҳатлар бор эди. Шу сабабли бугун уларни захирадан майдонга туширдим. Мени хурсанд қилгани, асосий таркибда уларнинг ўрнига тушган футболчилар ўзларини кўрсата олишди. Бу эса тўғри йўналишда кетаётганимиздан далолатдир. Агар жароҳат туфайли бир-иккита футболчини йўқотадиган бўлсак, уларнинг ўрнини боса оладиганлар борлиги бугунги баҳс кўрсатиб берди. Жароҳати бўлишига қарамай, Тожиевни барибир майдонга туширдим. Ўйин охирида босим ўтказишда Зайниддиннинг хизмати катта бўлди.