Бугун Корея Футбол Ассоцияцияси кей-лиаганинг 11 клубида тўп сурувчи 36 нафар хорижлик футболчиларнинг йиллик даромадлари ҳақидаги рейтингни эълон қилди.

Ушбу рейтингга кўра, "Сеул"нинг колумбиялик хужумчиси Молина кей-лигадаги энг кўп маош олувчи легионер ҳисобланади. Молина йилига сеулликлардан 1 миллион 324 минг долларни қуртдек санаб олади.

Иккинчи ўринда эса "Чонбук"нинг бразилиялик яримҳимоячиси Леонардо турибди. "Чонбук" ушбу футболчига йилига тахминан 1 миллион 185 минг доллар тўлайди.

Рейтингнинг 3-поғонасини Ўзбекистон терма жамоаси сардори ва "Сеонгнам" аъзоси Сервер Жепаров эгаллаган. Ҳозирда Жепаровнинг сеонгнамликлардан оладиган йиллик маоши тахминан 1 миллион 116 минг долларни ташкил этмоқда.

Кей-лигадаги 36 нафар хорижлик футболчилар умумий ҳисобда 17 миллион доллардан кўпроқ маош олишмоқда. Бу эса хорижлик футболчиларга махаллий футболчилардан ўрта ҳисобда 3 баравар кўп маош тўланаётганлигини англатади.

Отабек Йўлдошев,
Жанубий Корея, Сеул