Бухоро вилоятининг Когон шаҳрида футзал бўйича ўсмирлар ўртасида анъанавий мусобақа ташкил этилди.

12-16 апрель кунлари Бухоро вилоятининг Когон шаҳрида маҳаллий “Когон” футзал клуби, Испаниянинг “Joma” фирмасининг Ўзбекистондаги вакиллиги билан ҳамкорликда, футзал бўйича 2002-2004 йилларда туғилган болалар ўртасида анъанавий турнир ўтказилди.

Юқори савияда ўтказилган мусобақада ғолиблик “Когон” жамоаси вакилларига насиб этди. Финал учрашувида улар Фарғоналик спортчиларни 5:1 ҳисобида мағлубиятга учратиб, бош совринни қўлга киритишди.

Турнирнинг 3-ўрини учун кечган баҳсида эса, “Марғилон” ва “Қарши” жамоалари дуч келишди. Ушбу учрашувда рақибидан битта гол кўпроқ уришга муваффақ бўлан Марғилон жамоаси 4:3 ҳисобида ғалаба қозонди.

Таъкидлаш жоиз, ташкил этилган мусобақада Когон, Фарғона, Марғилон, Марғилон-2, Қарши, Навои, Бухоро ва Учқудуқ каби республиканинг турли вилоятларидан жамоалар иштирок этишди.

Мусобақа якунларига кўра, “Когон” вакили Шоҳжаҳон Шоҳназаров – “Энг яхши ўйинчи” деб топилган бўлса, Фарғона вилояти жамоасининг вакили Аъзамжон Акбаров – “Энг моҳир тўпурар” номига сазовор бўлди. Шунингдек, Қарши шаҳри жамоасининг посбони Қувончбек Рўзиев, мусобақанинг “Энг яхши дарвозабони” номига сазовор бўлишди.

Ўзбекистонда футзал спорт турини оммавийлаштириш мақсадида ўтказилган мусобақа оҳирида, “Joma” фирмаси томонидан ёш спортчиларга футзал тўплари, спорт формалари ва бошқа совғалар топширилди.