Футбол мухлисларининг хабари бор, жорий ҳафтада Ўзбекистон кубогининг 1/16 финал босқичига старт берилади.

Кетма-кет уч йилдан буён мамлакат кубоги баҳсларида финалга қадар етиб борган “Насаф” ушбу мавсумда биллур соврин учун курашни 1/16 финал босқичидан давом эттиради. Ушбу босқичда "аждарлар"га Тошкентнинг “Бунёдкор-2” жамоаси рўбару келади.

“Бунёдкор” жамоаси фарм-клуби ҳисобланадиган “Бунёдкор-2” жамоасига Муҳиддин Ортиқов бош мураббийлик қилади. Ушбу жамоа мамлакат кубогининг 1/32 финал босқичида ҳамшаҳарлари “Обод” жамоаси билан куч синашиб, 7:2 ҳисобида ғалабага эришди.

Ўзбекистон кубоги, 1/32 финал.
«Бунёдкор-2» (Тошкент) – «Обод» (Тошкент) - 7:2 (2:2 – асосий вақт, 5:0 – қўшимча вақт).
Ҳакамлар: Д. Досанов (Тошкент), А. Сидоров (Тошкент), А. Нажафалиев (Тошкент), А. Асимов (Тошкент).
Назоратчи: А. Клепиков (Тошкент).
Голлар: Д. Қаҳрамонов (30), Д. Аҳмадалиев (75), Д. Эсонқулов (97, 102), Э. Равшанов (108), Н. Мавлонов (111, 115, пенальти) – Д. Умархонов (10, 53).
Огоҳлантиришлар: Ш. Тожибоев (19), И. Қобилов (62), М. Қаҳрамонов (68), Д. Эсонқулов (101) – А. Абдураҳмонов (25), Д. Ҳасанов (31), Г. Умиров (74), К. Нурматов (114).
Четлатиш: Д. Искандаров («Обод», 60).

Агар “Насаф” футболчилари шанба куни ўтказиладиган учрашувда ғалабага эришадиган бўлишса, кубокнинг 1/8 финалига йўлланмага эга чиқишади. 1/8 финалда эса  “Шердор” – “Андижон” жуфтлиги ғолиби “Насаф” га рўбару бўлади. 1/8 финал беллашувлари икки учрашувдан иборат. Дастлабки ўйинлар 11-12 май санасига белгиланган бўлса, жавоб ўйинлари 17-18 май кунлари ўтказилиши режалаштирилган.

Ўтган йили мамлакат чемпиони “Бунёдкор” ва вице-чемпион “Локомотив” жамолари эса кубок баҳсларига чорак финалдан қўшилишади. Ўзбекистон кубоги “сетка”сига кўра, агар “Насаф” чорак финалдан ҳам муваффақиятли ўта олса, улар ярим финалда айнан “Бунёдкор” билан тўқнаш келишлари мумкин.