Ўзбекистон U-16 ўсмирлар терма жамоаси 22 апрель куни Дубайдаги йиғин давомида БАА ўсмирлар терма жамоасига қарши майдонга тушди.

Темур Олимхўжаев бош мураббийлигидаги Ўзбекистон U-16 ўсмирлар терма жамоаси 20 апрель куни навбатдаги ўқув машғулот йиғинини ўтказиш учун БААнинг Дубай шаҳрига жўнаб кетгани ҳақида маълумот берган эдик.

20-26 апрель кунлари оралиғида ўтказиладиган йиғин давомида Олимхўжаев шогирдлари БАА U-16 ўсмирлар терма жамоасига қарши иккита ўртоқлик учрашувида майдонга тушиши режалаштирилган эди. 22 апрель куни иккала терма жамоа ўзаро илк ўйинда майдонга тушишди ва учрашув БАА U-16 ўсмирлар терма жамоасининг 2:0 ҳисобидаги ғғалабаси билан якунланди.

Илк учрашув тенг курашлар остида ўтди ва биринчи бўлимда ҳисоб очилмади. Иккинчи бўлимнинг дастлабки дақиқаларида БАА ўсмирлар терма жамоаси пенальтидан ҳисобни очди. Ўйиннинг сўнгги дақиқаларида эса, амирлик ўсмирлар учрашувдаги иккинчи голини киритди ва учрашув 2:0 ҳисобида БАА ўсмирларининг ғалабаси билан якунланди.

Темур Олимхўжаев бош мураббийлигидаги Ўзбекистон U-16 ўсмирлари БАА ўсмирларига қарши иккинчи ўйинини 24 апрель куни ўтазади.

Эслатиб ўтамиз, Ўзбекистон U-16 ўсмирлар терма жамоаси шу йилнинг 6-20 сентябрь кунлари Таиланд мамлакати мезбонлик қиладиган U-16 ўсмирлар ўртасидаги Осиё Чемпионатида иштирок этади.

Ўртоқлик учрашуви.
22 апрель. Дубай.
БАА (U-16) – Ўзбекистон (U-16) 2:0.