Олий лига ўйинларининг беш тури ортда қолганида Қаршининг «Насаф» жамоаси  таркибда йўқотишларга учрамоқда. Мухлисларнинг севимли футболчисига айланган Илҳом Шомуродов яқинда жарроҳлик столига ётқизилди. voha.uz сайтининг аниқлашича, футболчи «кўричак» (аппендицит) сабабли операция қилинган. Илҳомнинг тезроқ соғайиб, таркибга қайтишини истаб қоламиз.

Шунингдек, Игор Таран ҳам жароҳати сабаб майдонга туша олмаяпти. "Аждарлар" мураббийлари Кенжа Тўраев ҳамда Азамат Алланиёзовларга кейинги турларда ишонч билдиришмоқда. «Насаф» таркибида бошқа ҳужумчи йўқлигини инобатга олсак, Рўзиқул Бердиев Фаррух Сайфиевни олдинроққа ўтказишини ёки Нажмиддин Нормуродов, Дониёр Нарзуллаев каби ярим ҳимоячиларни ҳам синаб кўришини тахмин қилишимиз мумкин. Балким ҳозирги кунда ўринбосарлар таркибида тўп сураётган, ўтган мавсум иккинчи лига тўпурари бўлган Ислом Рашидхонов асосий таркибда дебют қилар!

Кўпчилик мухлислар Шоҳрух Гадоевнинг қачон сафга қайтиши борасидаги саволлар билан мурожаат қилишмоқда. «Насаф» ПФК матбуот котиби Азиз Нурийнинг таъкидлашича, ўтган мавсум бошида миллий терма жамоамизнинг асосий таркиб футболчисига айланган Гадоев март ойида қайтадан операциядан ўтган ва шу сабабли биринчи даврада мухлисларни хушнуд қила олмаслик эхтимоли юқори. Умид қиламизки, Шохрух иккинчи даврадан бутунлай соғайган ҳолда таркибга қайтади.

Олим ТОЛИПОВ