"Нефтчи" клуби бошлиғи Комил Мирзабоев эгаллаб турган вазифасидан озод этилди. Бу воқеа кеча бўлиб ўтган "Машъал"га қарши ўйиндан кейин содир бўлди. Мурод Исмоилов шогирдлари мубораклар дарвозасига йўл топа олишмади ва дуранг қайд этилди.
Маълумотларга қараганда, аслида "Қўқон-1912"га қарши бўлиб ўтган Ўзбекистон кубоги баҳсидан кейин (бу ўйинда "Нефтчи" пенальтилар сериясида мағлуб бўлди) раҳбарият томонидан "Машъал"ни мағлуб этиш вазифаси қўйилган. Аммо клуб бу вазифани бажара олмади. Натижада Мирзабоев ишдан кетказилди.
Ўтган мавсумда Юрий Саркисян ва унинг мураббийлар штаби, шунингдек, клуб раҳбарияти истеъфога чиқарилганди. Жамоа бошлиғи лавозимини Комил Мирзабоев эгаллаганди. Қишда эса клубни кўплаб етакчи футболчилар тарк этишди ва жамоа ушбу мавсумда 6та ўйиндан бери ғалаба қозона олмаяпти (3та дуранг).
Маълумотларга қараганда, Комил Мирзабоевнинг ўрнини Тоҳир Кападзе эгаллайди. Жамоа бош мураббийи Мурод Исмоилов эса ўз ишини давом эттиради.
Ҳозирча ушбу ўзгаришларни "Нефтчи" расмий сайти расман тасдиқламади.
