"Арсенал" бош мураббийи Арсен Венгер Англия чемпионати 36-турида "Ньюкасл" устидан қозонилган ғалабадан сўнг фикрлари билан ўртоқлашди (3:0).
"Ҳа, бу олдинга қадам бўлди, аммо биз олдинга қадам ташлашда давом этишимиз керак. Якшанба куни ўз майдонимизда яна бир ўйин ўтказамиз ва яна ғалаба учун имконият бор. Биз ўз ўйинимиз ҳақида ўйлашимиз керак, олдинда турган рақиб ўйиндан ўйинга "очилиб" келмоқда.
Яна бир ғалаба ва биз кучли тўртликдамиз. Бу нарса клубнинг охирги йилларда бир текис ўйин кўрсатаётганидан дарак беради. Бу мавсумда маълум вақт чемпионлик пойгасини бошқардик, аммо энг муҳим паллада ишонган ўйинчиларимизни йўқотдик.
Англия кубогида "Ливерпуль", "Эвертон", "Тоттенҳэм" билан ўйнадик, чемпионлар лигасида камчилик бўлиб қолганимиз учун "Бавария"га ютқаздик.
Ўз салоҳиятимизни намойиш этдик, келгуси мавсум янада кўпроғига эришмоқчимиз, умид қиламанки, ҳаммаси яхши бўлади. Келинг, олдин мавсумни якунлаб олайлик", - дейди Венгер.
