Бугун, яъни май ойининг илк санасида “Нефтчи” клубида бир қатор ўзгаришлар юз берди. Жумладан, клуб директори вазифасида ишлаб келган Ҳикматжон Насритдинов ва шунингдек, бунгача мураббийлар штабида фаолият юритган катта мураббий Шамил Исеев, жисмоний тайёргарлик бўйича мураббий Элдор Сакаев, мураббий Диёр Мирзабоев ва матбуот котиби Аброр Деҳқонов билан  жамоа дўстона муносабатда хайрлашишга қарор қилди. Уларнинг клуб равнақи йўлида қилган хизматлари учун миннатдорчилик билдирган ҳолда келгуси фаолиятларида омад тилаймиз.

Раҳбарият мураббийлар штабига маҳаллий ёш мураббийлар Сергей Лебедов, Баҳром Ҳайдаров ва Шерзод Раимжоновни жалб этди. Мухлисларга яхши маълумки, ушбу "трио" жамоамиз учун бегона эмас. Сабаби уларнинг ҳар бири илгари футболчилик фаолиятининг асосий қисмини айнан “Нефтчи” жамоасида ўтказган. Сергей Лебедов илгари мураббий сифатида ҳам ишлаганини ишқибозлар яхши билишса керак. Маълум танаффусдан сўнг мураббий яна жамоага қайтди.

Клуб техник директори лавозимида эндиликда Султон Зайлобиддинов фаолият юритадиган бўлди. Жамоанинг янги мураббийлари ва бошқа ходимларига келгуси фаолиятларида омад тилаб қоламиз.