"Бавария" бош мураббийи Хосеп Гвардиола Германия чемпионатининг сўнгги турида "Штутгарт" билан ўйин олдидан ўтказилган матбуот анжуманида яхши кайфиятда ҳазиллашишга сабаб топди.
"Бавария" муддатидан олдин чемпионликни нақд қилган бўлиб, "Штутгарт" билан ўйиндан сўнг жамоани кумуш лаганни топшириш, чемпионлик кортежи ва Мариенплацда пиволи душ каби маросимлар кутмоқда.
"Биламан, бу ерда катта анъана бор. Мен анъаналарни севаман ва пиволи душ ҳам менга муаммо бўлмайди.Ўйинчилар буни исташса - қилаверсинлар, - деди Гвардиола, сўнг бироз ўйланиб, табассум билан қўшимча қилди: - Аммо ким устимга пиво қуйса - у Кубок финалида ўйнамайди".
Эслатиб ўтамиз, "Бавария" ва "Боруссия" ўртасидаги Германия кубоги финал баҳси 17 май куни, Берлинда, "Олимпиаштадион"да бўлиб ўтади.
