Ар-Риёдга 12 май куни тушликдан сўнг етиб келган Тошкентнинг “Бунёдкор” жамоаси маҳаллий вақт билан кеч соат 21:00да Саудия Арабистонидаги энг улкан арена – “Қирол Фаҳд” халқаро стадионида ўзининг илк машғулотини ўтказди.

Роппа-роса бир соат давом этган машғулот жараёнида Саудия Арабистонига олиб келинган барча 18 нафар футболчи иштирок этди. Таркибда йўқотишлар йўқ, футболчиларнинг кайфияти жанговор руҳда.

Аслини олганда, Осиё Чемпионлар лигаси регламентига кўра, “Бунёдкор” ушбу стадионда 13 март куни ўзининг ўйинолди расмий машғулотини ўтказиши керак эди. Бироқ расмий машғулот ўтадиган пайтда ушбу стадион Осиё Чемпионлар лигаси 1/8 финал жавоб учрашувлари доирасидаги “Ал-Шабаб” – “Ал-Иттиҳод” баҳсига мезбонлик қилаётган бўлади. “Қирол Фаҳд” халқаро стадиони “Ал-Ҳилол”, “Ал-Шабаб” ва “Ал-Наср” клубларининг уй аренаси ҳисобланади. Шу боисдан ҳам “Бунёдкор” ушбу арена чимларини 12 май санасида синаб кўрди. Энди “Бунёдкор”нинг эртанги тайёргарлиги бошқа майдонда ўтади.

Футболчилар машғулот жараёнида мураббийлар томонидан берилган барча кўрсатма ва юкламаларни тўлиқ бажаришди. Уларнинг ҳозирги ҳолати юқори савияда, кайфиятлари эса жанговор руҳда эканлигини шундоққина кўриниб турарди.

Ўйлаймизки, “Бунёдкор” 14 май оқшомида “Ал-Ҳилол” билан баҳсда ўзи учун керакли бўлган ижобий натижани қайд этиб, ўзбекистонлик футбол мухлисларига олам-олам қувонч улашади.

Қуйидаги ҳавола орқали “Бунёдкор”нинг “Қирол Фаҳд” халқаро стадионидаги машғулоти видеошарҳи билан танишишингиз мумкин.