"Локомотив" — "Қизилқум" (4:1) учрашувидан сўнг ташкил этилган матбуот анжуманида "темирйўлчилар" бош мураббийи Вадим Абрамов иштирок этиб, ўйин ҳақидаги фикрлари билан ўртоқлашди.

— Бугун икки хил тайм бўлди. Танаффусда йигитлар билан яхшилаб гаплашиб олдик. Қўлга киритилган ғалабадан хурсандман.

— Жамоангиздаги уч футболчи — Фарҳод Тожиев, Қувондиқ Рўзиев ҳамда Илҳом Суюновнинг бугунги ўйини ҳақидаги фикрларингизни билмоқчи эдик.
— Тожиев ва Суюнов ўз оптимал формасидан ҳали анча узоқдалар. Ҳозирча улар ўзларидан кутилаётган ўйинни кўрсата олишмаяпти. Рўзиев ҳақида эса яхши ўйнади, аммо бироз ҳаяжонлангани сезилиб турди.

— Легионерлар одатда маҳаллий футболчилардан кучли бўлгани учун жамоага жалб этилади. Сизда эса улар захира ўриндиғида ўтирибди. Айни вақтда уларнинг ҳолати маҳаллий футболчиларникидан ёмонроқми?
— Шевченконинг ўйинида сўнгги вақт пасайиш кузатилди. Аммо кейинги турда, "Машъал"га қарши майдонга тушса керак. Олдимизда муҳим ўйинлар кўп, шу боис таркибдаги футболчиларни алмаштириб турибмиз.

— Акмал Холматов асосий таркибдан ўрин олмаяпти. Унга "Нефтчи" қизиқаётгани ҳақида гаплар юрибди. Бу қанчалик ҳақиқатга яқин ва агар у кетишга қарор қилса, бунга қандай муносабатда бўласиз?
— Холматов агар "Нефтчи"га ўтишни ўзи истаса, бундай бўлиши мумкин. Акмални тушунаман, у ҳам майдонга тушишни истайди. Бироқ ҳозирча унинг жойида Жасур Ҳасанов ўйнамоқда. Шу боис Холматов захирада ўтирибди.