Бугун Қозоғистон Премьер-лигасининг 12-тури доирасида "Актобе" ўз майдонида "Шахтёр"ни қабул қилди. Актобеликлар ашаддий рақиблари устидан йирик 4:0 ҳисобида ғалаба қозонишди.

Ўйинни асосий таркибда бошлаган Александр Гейнрих 65-дақиқада жамоасининг учинчи голига муаллифлик қилди. Ҳимоясини чиройли тарзда алдаб ўтиб, дарвозабонни ҳам доғда қолдирди. Орадан 3 дақиқа ўтиб эса у захира олинди.

Темир Кападзе эса ўйин қайдномасига киритилган бўлса-да, захира ўриндиғида қолдирилди.

"Шахтёр" сафида Камолиддин Мурзоев учрашувни бошланғич таркибда бошлади. Ҳамюртимиз 55-дақиқада бошқа футболчига алмаштирилди. Шавкат Саломов эса 70-дақиқада майдонга туширилди.

Ушбу ғалабадан кейин "Актобе" ўз очколарини 29тага етказиб олди ва яқин таъқибчиси "Астана"дан 7 очкога ўтиб кетди.