«Пахтакор» ҳамда «Навбаҳор» жамоалар ўртасидаги ўйиндан кейин ҳар икки жамоа бош мураббийлари иштирокида матбуот анжумани бўлиб ўтди. Аввало Бахтиёр Ашурматов саволларга жавоб қайтарди.

— «Пахтакор» — кучли жамоа. Йигитларим бугун қаҳрамонларча ўйин кўрсатди. Биз ҳимоявий ўйин кўрсатишга мажбур бўлдик, чунки рақиб жуда кучли эди. Лекин бир нарсани таъкидлашни хоҳлардимки, ҳакамлик бугун яхши бўлмади. Рақибни ғалаба билан табриклайман. Бугун ҳакам «Пахтакор»нинг ғалабасини жуда ҳам хоҳлади. Иккинчи сариқ карточка берилганда ҳам футболчимиз майдонда иккита тўп эди, биттасини тепиб юборгани учун огоҳлантирилди ва майдондан чиқиб кетди. Пенальти ҳақида гапирмоқчи эмасман. Футболчилар кўзда ёш билан айтишдики, улар жароҳат олиб майдондан чиқишганда ҳакам уларга ҳа деганда рухсат бермади. Сабаби сўралганда, майдондан чиқдингми озроқ туришинг керак. Балки бу гапларим ҳакамларга оғир ботар, балки кейинги ўйинларда бизни янада ёмон кўриб қолишар, мени мураббий сифатида ёмон кўриб қолишар, менинг жамоаларимни чўктиришга ҳаракат қилишар, лекин ҳакамлик холис бўлмади. Мен мағлубиятда ҳакамни айблашни хоҳламайман.

— Сизда ҳужумда ўтиш учун имкониятлар бўлганди, нима учун таваккал қилиб олдинга бормадингиз?
— Биз «Пахтакор»га қарши очиқ ўйин қила олмаймиз. Қизил карточка олгандан кейин биз бутунлай ҳимояланишга мажбур бўлдик. Бошқа йўл йўқ эди. Биринчи қизилгача иккинчи ҳужумчи — тезкор Абдумалик Абдуллаевни туширмоқчи эдик, лекин ўша четлатиш ҳаммасини ўзгартириб юборди.

— Ҳар ким ўз кўзи билан кўради. Сиз бошқача, «Пахтакор» мухлислари бошқача. Пенальти масаласига алоҳида тўхталинг, илтимос.
— Мен ўша вазиятни аниқ кўрмадим, лекин ундан олдинги вазиятда ҳужумдаги футболчи бизнинг футболчимизни туртиб кетди. Ўша вазиятда ҳакам тўхтамади, лекин ҳакам мезбонларнинг ғалабасини хоҳлагани учун рақиб фойдасига ишлади.

— Баъзи вазиятларда футболчиларингиз ҳақиқатдан ҳам жароҳат олишгандир, лекин ҳаддан ташқари кўпайиб кетди. Жамоангиз ҳақиқий араб футболини намойиш этди. Бунга нима дейсиз? Балки бу ётиб олишлар ҳакам ўйин тақдирини қўлдан чиқаришига олиб келгандир?
— Бу сизнинг фикрингиз. Биз Мансур Саидовни алмаштирдик, у ростдан ҳам жароҳат олди. Сиз бизнинг 10 киши бўлиб «Пахтакор»га қарши ҳужумкор ўйин қилишимиз керак эдими? Шуни хоҳлаяпсизми? Биз натижа учун қўлимиздан келган ишни қилдик. Йигитларим чарчаб қолишди. Хўп, бу вазиятда бизнинг айбимиз бор дейлик, лекин нима учун тўп қайтарилмаган вазиятларни айтмаяпсиз? Кўрган бўлсангиз, мухлислар ёмон хаёлга боришмасин деб жамоамиз шифокорларига чиқмаслигини айтдим. Хоҳламадим вақтни чўзишни. Ҳакам ҳақида гапирсам, уни ётиб олишлар эмас, ғалабани жуда ҳам хоҳлагани издан чиқарди.

— Сиз ҳакамлар ҳақида гапирмайман деган эдингиз, нимага фақат ҳакам деяпсиз?
— Гапиришга мажбурман. Футболчиларим кийиниш хонасида йиғлаб ўтиришибди. Қандай гапирмайман? Улар вақти келса пулсиз ўйнашга ҳам мажбур бўлмоқда, нимага гапирмаслигим керак? Бугунги мағлубият жуда алам қилди.

— «Пахтакор»га қарши иккинчи даврадаги ўйинда ҳам шундай бўлмаслиги учун қандайдир чора кўриладими? «Пахтакор»га қарши алоҳида тайёргарлик кўриладими? Ҳакамлик масаласида қандайдир профилактика қилинадими?
— Мен йигитларимга ҳам айтдим, ҳакам ҳақида умуман гапирманглар. Мен ҳозир ҳакамни эҳтирос билан қаттиқ танқид қилгандирман. Мен ўйинни яна бир марта кўриб кейин фикримни айтаман.