Ҳурматли футбол мухлислари!

Барчамиз орзиқиб кутаётган Мундиалга ҳам саноқли кунлар қолди. STADION.UZ сайти асосчиси - “Registon-Press” МЧЖ минглаб мухлислар манфаатини ўйлаб хайрли ишга қўл урди. МЧЖ муассислигидаги “Парвона” газетасининг Бразилияда бўлиб ўтадиган ХХ Жаҳон чемпионатига бағишланган махсус сони нашрдан чиқди.

Силлиқ муқовали, 68 саҳифадан иборат ушбу нашрда сиз шу пайтгача бўлиб ўтган 19 та жаҳон чемпионати статистикаси, 18 чемпион мураббий, ЖЧнинг “Олтин тўп”ини қўлга киритган 19 футболчи, 32 та терма жамоанинг ЖЧ-2014 сари босиб ўтган йўли, мураббийлари ва сардорлари, шунингдек Бразилияга йўл олган таркиблари билан танишасиз.

ЖЧ ҳакамлари, ҳомийлари, расмий тўпи, регламенти ва мукофотлари ҳақидаги маълумотлар, ўзбек футбол мутахассислари билан интервью, бўлиб ўтган Жаҳон чемпионатлари ҳақида қизиқарли фактлар, рақамлар ҳам сизни бефарқ қолдирмайди, деб ишонамиз.

Энг асосийси - Жаҳон чемпионатининг бўлиб ўтадиган ўйинлари муҳим ва қулай кетма-кетликда оддий ва тушунарли қилиб берилган.

Таъкидлаш жоизки, ушбу нашр stadion.uz сайти билан ижодий ҳамкорликда тайёрланган ва материаллар устида Шуҳрат Шокиржонов, Олимхўжа Бўронов, Сардор Юсупов, Қаҳрамон Асланов ва Шерзод Раджабовлар ишлашган.

“Парвона”нинг ЖЧ-2014 га бағишланган махсус сонини харид қилинг ва Мундиал давомида ажралмас ҳамроҳга эга бўлинг!